Hənhən 8 - Bible en Guidar

Tampoŋ mabuhuloni

¹ Aka ahok tampoŋ mabuhuloni, təki a disiŋ pak asanək sləɓəkə hã gap wəɗak na təbəz na ənziya.

² Nulek maslayɗe buhul ziwziw aba Maŋgəlva, yaŋ məpsit gozloreɗ buhul.

Mohoɗe buhul ( 8:3—11:19 )

³ Yaŋ maslay maɓɓan ade əziw go'o aza təki nawzaɓ-Maŋgəlva, makasli na meleŋge tay avani. Məpsəni tursanɗe diyɗa, vi dəpsingin Maŋgəlva sap dit əkkamɗe net ɗiy na Maŋgəlva pak aka təki nawzaɓ-Maŋgəlva na meleŋge dəsan aba mazaŋga na məlĩ naka.

⁴ Enene net tursanɗe agilyoŋguk səmmba va maslay əmbat aba Maŋgəlva sap dit əkkamɗe net ɗiy na Maŋgəlva.

⁵ Yaŋ maslay agəm makasliya, aknəh də offo na matuya, agbo' aka dəlvafuŋgu. Yaŋ akkpaŋ əhãy va buna, wəlet ɗiyi, əwiɗ na buna gəm əɓla na dəlvafuŋgu.

Maslayɗe en poɗo maddaabəŋ tay əffotin gozloreɗi

⁶ Maslayɗe buhul məs də gozloreɗ buhul avet nek azaɓanənək zit naffoti.

⁷ An maddaabəŋ affonək gozloro nani: Yaŋ ɓeɓrezleɗ sap də offo gəm mbel aziyaŋ aka dəlvafuŋgu; taka səddəv əprasl hoku na dələv arəmək offo, taka səddəv əprasl hoku net wəleŋɗe arəmək offo, gaslamba məddəkan pak arəmək offo.

⁸ Maslay masula'ən affonək gozloro nani: Yaŋ agəɗ va kəɓəs na mossorgo metiŋgin dərəm offo, yaŋ məzgan a pehe. Taka səddəv əprasl hoku na pehe kpaŋ mbeli.

⁹ Taka səddəv əprasl hoku net zəgeɗ məzəmiɗit mederet na pehe pak amtaŋka, taka səddəv əprasl hoku net bəlayɗe arayaŋka.

¹⁰ Maslay mahoko'it affonək gozloro nani: Yaŋ ngərzla metiŋgin apət sə disiŋ, tay əzla va offo. Abətək aka taka səddəv əprasl hoku net məlpeŋge gəm aket iŋkile miyma.

¹¹ Iya nan na: Ndərzla. Taka səddəv əprasl hoku net iŋkile kpaŋ ndərzla, ɗiy diyɗa amtaŋgək sən iŋkile akkpaŋgək tatrãhɗe.

¹² Maslay mapoɗo'it affonək gozloro nani: Taka səddəv əprasl hoku na paya, taka səddəv əprasl hoku na təla gəm taka səddəv əprasl hoku net ngərzleɗ mərgeti. Attireŋgik taka səddəv əprasl hoku neti: əsɓəta azanək əkeɗeɗe nan taka səddəv əprasl hoku, dəfəɗ pak vaska'e.

¹³ Ndəni nəzi harawa: Yaŋ nəprəm wəla gazla dəveŋ hã disiŋ faraɗa ətəlma dayadaya na: Əraya! Əraya! Əraya aket ɗiy naka dəlvafuŋ sən gozloreɗ net maslayɗe hoku məs dədaffoŋ əmpa.