Hənhən 7 - Bible en Guidar

Ɗiy na Israyel 144 000

¹ Dərɓaga aska, nəwələk maslayɗe poɗo ziwziw aka təkzləm dələv poɗogəni, tay ərmanən səmyã temtem poɗo naka dəlva, vi səmyã adaɓla aka dələv ɓa, aka pehe ɓa, mãy aka wəlaŋga taka dayday ɓa.

² Nəwələk maslay maɓɓan dazzan səmmba pay nampum, də tampoŋ na Maŋgəlva madaran avani. Apelik dayadaya sit maslayɗe poɗo məs məpsit gbogboŋ nawzəmgən sãhã na dəlva gəm na pehe,

³ amna: «Məsla zukum, kədawraygənən dələv ɓa, pehe ɓa awaniɓa wəleŋɗe tak məɓəl əɗi tampoŋ a mirbizit məɗɗaŋ wəza na Maŋgəlva nam ɓa ɓa.»

⁴ Yaŋ nəprəm əŋɗa net en məɗi sit tampoŋ vani: Tahəŋ gabal səkat də kaklam poɗo kiyit poɗo sə waleŋgit mahəlfaɗe net mə Israyelɗe pakə.

⁵ Səddəv mahəlfa na Yuda gabal kəlaw kiyən sula məɗi sit tampoŋ. Səddəv mahəlfa na Ruben gabal kəlaw kiyən sula, səddəv mahəlfa na Gad gabal kəlaw kiyən sula,

⁶ səddəv mahəlfa na Aser gabal kəlaw kiyən sula, səddəv mahəlfa na Neftali gabal kəlaw kiyən sula, səddəv mahəlfa na Manasse gabal kəlaw kiyən sula,

⁷ səddəv mahəlfa na Simeyoŋ gabal kəlaw kiyən sula, səddəv mahəlfa na Levi gabal kəlaw kiyən sula, səddəv mahəlfa na Isakar gabal kəlaw kiyən sula,

⁸ səddəv mahəlfa na Zabulon gabal kəlaw kiyən sula, səddəv mahəlfa na Yosef gabal kəlaw kiyən sula, səddəv mahəlfa na Benyamin gabal kəlaw kiyən sula məɗi sit tampoŋ.

Ɗiy diyɗa aba mazaŋga na məlyã

⁹ Ɗərɓaga aska, nəwəl na: Ɗiy diyɗa məza ɗəf aɓap na əŋɗet ɓaŋ, ɗiy net səret ɗiy naka dələv pakəŋ, səzet mahəlfaɗe gəm səddəvit maɗe awetdi pakəŋ. Tahəŋ ziwziw aba mazaŋga na məlyã gəm abat ndargayãk dit lukutɗe məsilip babarɗe azeti gəm va gugozlo aveti.

¹⁰ Tay ətəlaŋ ma dayadaya na: Əkõh na səza Maŋgəlva nam dəsan aka mazaŋga na məlĩ gəm səzat ndargayãk ade.

¹¹ Maslayɗe dəssoŋ ziwziw tərwəsl ki mazaŋga na məlĩ dit ɗiy gugriɗe gəm zəgeɗ memeyẽɗ poɗo nek azbəraŋgək aba mazaŋga na məlĩ mirbizit afuŋ ne', agagdakanənək Maŋgəlva.

¹² Tay ənahaŋ na: Amin! Əlva, gagdaka, maɗɗula əɗɗa əsoko, əɗikiya, əɓapa gəm gbogboŋ pak na Maŋgəlva nami pay pakə hã faɗə. Amin.

¹³ Ɗəf taka səret ɗiy gugriɗ nek agəmək əpele anah su na: Ɗiy dit lukutɗe məsilip babarɗe azetiŋ mədəŋgaŋ di, səŋga azzoŋ di?

¹⁴ Nəzlan sənək na: Daya nawa kəsənka! Aɓsu na, ndəɗaŋgəŋ ɗiy məs dəgilyoŋ səddəv əzəmsãhã metiŋgini. Askoɓunik lukutɗe neti, azzoretinik lukutɗe net addivit mbel nat ndargayãk kpaŋgaŋ babarɗe.

¹⁵ Vini assoŋ ziwziw aba mazaŋga na məlĩ na Maŋgəlva, adaɗɗaŋ sənən wəza kapay də dəfəɗ pak addəv gəla na Maŋgəlva nani. Ɗəf məs dəsan aka mazaŋga na məlĩ dədawget sən kiyni.

¹⁶ Mãy ade na ɗah ɓa, meme adenin na ɗah ɓa, paya gəm slãhslãh nan azle na ɗah ɓa,

¹⁷ vi ndargayãk təsat aka walaŋ mazaŋga na məlĩ watəteɗe, watəke amet iŋkile miyma na zeŋgile, Maŋgəlva wapay sit sin səreti.