Hənhən 6 - Bible en Guidar

Ndargayãk tat əhok tampoŋɗe en sləre maddaabəŋ

¹ Yaŋ nəzi harawa: Aka ndargayãk təkol tampoŋɗe səret en buhul neki, yaŋ nəprəm wəla zəga mamayã an maddaaɓəŋ səret en poɗo nek əhãy va ɓaɓəlma buwən na: «Ade!»

² Yaŋ nəwəl na: pələs babari. Ɗəf nakan tay də bəle avani, məpsəni mətərkiya. Ambatək va məskəwəla vi kaskawəla.

³ Aka ahok tampoŋ masula'ən, yaŋ nəprəm zəga mamayã masula'ən dawnəh na: «Ade!»

⁴ Yaŋ pələs maɓɓan agili, pələs van pepreŋgi witwiti, məpsəni gbogboŋ sən ɗəf nakan dəzagən zay səka dəlvafuŋ ɗiy dəbayanəngən ziti gəm məpsəni masalam metiŋgini.

⁵ Aka ahok tampoŋ mahoko'ən, yaŋ nəprəm zəga mamayã mahoko'it ənəh na: «Ade!» Nəwəl na, pələs titire, ɗəf nakan tay də zəga nawsla gagdak na zəga avani.

⁶ Nəprəmək zəga va wəla ɗəf a waleŋgit zəgeɗ memeyẽɗ poɗo nek ənah na: Haykəmari tasa taka nawfaɗ wəza əsɓəta taka. Haykəmari pepreŋ tasa hoku nawfaɗ wəza əsɓəta taka'a. Dəwəl sən mẽlẽ gəm mbazla na kədawrəŋgən ɓa.

⁷ Aka akol tampoŋ mapoɗo'ən, yaŋ nəprəm zəga mamayã mapoɗo'it nak ənəh na: «Ade!»

⁸ Ya nəzi haraw na: pələs kpərohpərohu. Ɗəf dəpeŋ nakani, iya nan na «əmta», təki nassa net ɗiy mimtit tay əzbani. Məpsiti gagdak aka pəɗak na pəɗak na dəlvafuŋ vi kawzet ɗiy də masalam, də mayã, də əmta gəm dit zəgeɗ naka dəlva.

⁹ Aka ahok tampoŋ masle'eni, nulak zeŋgilet ɗiy məs məbeyit aka wən na əpel na Maŋgəlva, gəm vi adabbalanən əpel nani.

¹⁰ Tay əŋzlaŋ vaŋvəl dayadaya na: Hã dewɗe di, Daya salala an gegesiŋ, kədawtaw wəna gəm kədampəl kiyit mbel nam aket ɗiy naka dəlvafuŋ di?

¹¹ Yaŋ məpsən lukut məsilip babar sən naway di pak səmmbeti, yas mənah sit dəssoŋgən addəv əɓəs pay siɗikke əmpa, hã gap əŋɗa net mekyeŋgiɗit na wəza gəm milmiŋgiɗit en adawbayaŋ va məbeyit dəgapgəni.

¹² Yaŋ nəzi harawa: Aka ahok tampoŋ masləreni, dəlvafuŋ aɓələk diyɗa sawɓa. Pay kpaŋ titir va gabaga titire, təla dəwənnan kpaŋ va mbeli.

¹³ Ngərzleɗ na disiŋ abətaŋgək afuŋ, va uwa na sokoyo məgalən məs barkataŋ ahoru.

¹⁴ Disiŋ atrayək va ɗerewel məktəmən, mosorgoɗe gugriɗ dit mətuwəraɗe pak məzargiti sə gəleti.

¹⁵ Məlyeŋge naka dəlvafuŋ, ɗiy gugriɗe, deyeɗe net məzəlpaŋgə, məsaryeɗi, ɗiy gagdakɗe, belemɗe, dit ɗiy məza belemɗeŋ ɓa pak aɗamaŋgək a bətəŋ net massorgeɗe dit gərmeŋge.

¹⁶ Tay ənahaŋ sit massorgeɗe gugriɗ dit gərmeŋge na: Məɓəsl akamə, məɗamam faraɗa səma ɗəf məs dəsan aka mazaŋga na məlyã, gəm səma ədagədəv nat ndargayãkə!

¹⁷ Vi pay metiŋgin na ədagədəv net agapka. Naway nawɓap əkõh di?