Hənhən 5 - Bible en Guidar

Ndargayãktə kaka' təgap nawkol ɗerewel

¹ Nəwələk ɗerewel məktəmən ammba va dəzəŋ na ɗəf dəsan ɗewwe aka mazaŋga na məlyã, ɗerewel məverin dəddəvən gəm dəka dəɓan pakə, mətip man dit tampoŋɗe buhul.

² Yaŋ nəwəl maslay də gagdak ətəlma dayadaya na: Naway dəgap nawkol ɗerewel van gəm nawhok tampoŋɗe nan di?

³ Ya ɗəf nan tay a disiŋ, mãy aka dəlvafuŋ, mãy ammba dələv nawɓap əkol ɗerewel vani mãy nawla əŋɗan ɓa.

⁴ Nəhəmək diyɗa vi ɗəf tay dəgap nawkol ɗerewel van ɓa, mãy naŋɗan ɓa.

⁵ Yaŋ ɗəf taka səret ɗiy məsɓe anah su na: Kədawhəm ɓa, awla ɓoolu mahəlfa na Yuda, dəhən Davit nan askək wəla, waɓap əkol ɗerewel vani gəm əhok tampoŋɗe nan buhul.

⁶ Yaŋ nəwəl Ndargayãk ziwe a walaŋ mazaŋga na məlĩ dit zəgeɗ memeyẽɗ poɗo a waleŋgit ɗiy məsɓeti, ndargayãk vat tat va kəɓəs na mətawni wəlata. Mohon tay buhul, haran buhul, ndəɗaŋgəŋ Əmpəsɗe na Maŋgəlva buhul məs aslən aka dəlvafuŋ gboŋgu.

⁷ Yaŋ ndargayãk nak tədder ətaf ɗerewel səka va dəzəŋ na ɗəf ɗewwe aka mazaŋga na məlĩ naka.

⁸ Adan tətaf ɗerewel naka, zəgeɗ memeyẽɗ poɗo dit ɗiy məsɓet kaklaw sula kiyit poɗo nek appu'oŋ abat ndargayãk nakə, naway di pak tay də gəzləŋtəndəŋ avani, gəm makasli na meleŋge məknahən pa' də tursan, ndəni əkkam net ɗiy salala na Maŋgəlva.

⁹ Yaŋ adawyaŋ gəlya meleketeni: Istə kəgap nawgəm ɗereweləŋka. Gəm nawhok tampoŋɗe nani, vi mətawni wəloko, kəmetik ɗiy sən Maŋgəlva dit mbel nok səddəv mahəlfa pakə, səddəv ma pakə, də zemvit ɗiy temtem pakə.

¹⁰ Yaŋ kəɗɗe dəssoŋgən məlyeŋge gəm məsdəlveŋge na Maŋgəlva, wazəmaŋ məlĩ aka dəlvafuŋgu.

¹¹ Yaŋ nəzi haraw əmpa: Nəprəm wəllet maslayɗe diyɗa tuwəɗ ki mazaŋga na məlĩ dit zəgeɗ memeyẽɗ gəm ɗiy məsɓet neki, wəŋɗa net tay dubu dubuɗe gəm gabal kaklawɗe.

¹² Yaŋ adawyaŋ gəlya də wəllet dayadaya: Ndargayãk mətaw wəlat nakə, təgapək narəh əɓapa, arya, maɗɗula, gbogboŋgo, gagdaka, əɗikiya gəm əlva.

¹³ Zəgeɗ məzəmiɗit baymeti, a disiŋ, aka dəlvafuŋ, ammba dəlvafuŋ, a pehe, zəgeɗ dəssoŋ adak nədaprimit ətəlaŋ ma na: Əlva, gagdaka, əɗi kiya, əɓapa dəsan sən ɗəf məs dəsan aka mazaŋga na məlyã gəm sət ndargayãk pay pakə hã faɗə.

¹⁴ Zəgeɗ memeyẽɗ poɗo nek əzlanən na: Amin. Ɗiy məsɓet əppu'oŋ afuŋ, əgagdakani.