Hənhən 4 - Bible en Guidar

Ɗerewel məktəmən də ndama buhul ( 4:1—8:2 ) Əɗi ki Maŋgəlva a disiŋ

¹ Sə dərɓaga as na, nəwəl na: Maddamba tay viŋŋge a disiŋ. Wəla ɗəf maddaabəŋ nəprəm əpel su va gozloro amna: Apeŋ aŋka, wanərban suk zəga məs dədaɗɗa sə dərɓaga aŋka.

² Go'ləŋ Əmpəs agulwəka, nəwəl na, mazaŋga na məlĩ tay məɗiyən a disiŋ, ɗəf akan ɗewwe.

³ Ɗəf dəsan akan vani, tay əwiɗ va gərəm Yaspi gəm va gərəm sardiya. Məzzəɗa tay ki mazaŋga na məlĩ nan van tərwəslə, əwiɗ nan va gərəm imaradi.

⁴ Ki mazaŋga na məlĩ van tərwəsl na, məzeŋgeɗ na məlĩ tahəŋ kaklaw sula kiyit poɗo, ɗiy gugriɗ tahəŋ kaklaw sula kiyit poɗo tuŋtuŋ aket mezeŋgeɗ veti, dit lukutɗe babarɗe azeti, də mətərkiya na meleŋge aketi.

⁵ Əwiɗ na buwna, ɓaɓəlma wəlet ɗiyi gəm əhay na buwna əgilyon səza mazaŋga na məlĩ vani. Lalamɗe buhul tahəŋ məsɗet aba mazaŋga na məlĩ vani, ndəɗaŋgə Əmpəsɗe buhul na Maŋgəlva.

⁶ Aba mazaŋga na məlĩ vani, zəga tay va pehe məɗəŋgərən vit va gərəm krusta. Aka walaŋ də mazaŋga na məlĩ naka, zəgeɗ madereket tahəŋ poɗo kiyən tərwəslə, dəɓet də dərɓeget pak məknihit də hereti.

⁷ Zəga mamayã madaran an maddaabəŋ, agilik va ɓoolu, an masula'ən va medgeɗge, mahoko'ti haran va na ɗəfa, mapoɗo'ti agilik va gazla aka makapal.

⁸ Zəgeɗ memeyẽɗ poɗo neki, awandi pak tay də persleken sləre sləre, zit tərwəslə gəm kəladdivit pak hereti. Kapay də dəfəɗ pak awɓətaŋ dawtəlma ənəh na: Salala, salala, salala, Daya məlĩ Maŋgəlva ɓa, ndən məs dəsan farə, dəsan kakaŋka gəm dədazzani.

⁹ Va zəgeɗ memeyẽɗ nek adawgagdakanəni, adawətibirenəni gəm əɗɗaŋ sənən əsoko sən ɗəf dəsan aka mazaŋga na məlĩ naka, sən məs dəsan madaran hã faɗə.

¹⁰ Ɗiy məsɓet kaklaw sula kiyit poɗo nek əppu'oŋ aba ɗəf məs dəsan aka mazaŋga na məlĩ naka, tahəŋ əgagdakanən ɗəf məs dəsan madaran hã faɗ naka. Tahəŋ əzganən mətərkiya net aba mazaŋga na məlĩ nak də ənah na:

¹¹ Daya Maŋgəlva namə, kəgapək nawrəh gagdaka, əɗi kiya gəm əɓapa. Vi istə kəzəməɗ zəgeɗ pakə, kəŋgələk dəssoŋgəni, yaŋ kəzəməɗe.