Hənhən 3 - Bible en Guidar

Alabara sən gəla na Maŋgəlva na Sardis

¹ Aver sən maslay na gəla na Maŋgəlva na Sardis: Aŋki məs dərme əmpəsɗe na Maŋgəlva buhul gəm ngərzleɗ buhul ammba vani: Nəsinik wəzaɗe noko: sləmok tay əbbal na modorok kənani, ya məmtuk kənani.

² Asok ɗezleŋge, asɓan an dəmbər avok dədaŋgla əmtaŋka, vi nərəh wəzaɗe nok mogget gərak ama hara Maŋgəlva naw ɓa.

³ Aɗɗumon zəga an kərahə gəm an kəprəm kana. Arma gəm aɗimarava. An kəsok ɗezleŋge ɓa na wanəde va məhãla məza is əsən pay məs nədazzaw gurzik akok ɓa.

⁴ Ya is tat dit ɗiy meɓɓet siɗikke a Sardis məza dərnoketin lukutɗe net ɓa. Tahəŋ wədawaŋ də in dit lukutɗe baberɗe azeti, vi net agapaŋgək nazbawa.

⁵ Məskəwəla wagul lukutɗe baberɗe vaska; nəvvuyon na iya nan səddəv ɗerewel na zeŋgile ɓa. Ya wanənah aba Afu gəm abet maslayɗe nan na, ɗəf nawi.

⁶ Ɗəf məs də sləman na, dəprəm an Əmpəs adawnah sit gəleɗe na Maŋgəlva.

Alabara sən gəla na Maŋgəlva na Filadelfiya

⁷ Aver sən maslay na gəla na Maŋgəlva na Filadelfiya: Aŋki Ɗəf an Salala, an Gərrakə adawpele, ndən məs dərma lekile na Davit avani, an akoluko, ɗəf tay naɓap əmsan ɓa, an amsanəka ɗəf tay naɓap əkolən ɓa:

⁸ Nəsinik wəzaɗe noko. Awle, nəɗiyək metive kollo aboko, məs ɗəf tay nawɓap əmsan ɓa, gbogboŋ siɗikke yi azoko, də as pak kərmak əpel nawa, kəzelen iya naw ɓa.

⁹ Yaŋkəŋ na, in tat əpsuk təki nakkal net ɗiy na Satan avoko, en məɗinən ki zit ka mə Yudeɗi ya mə Yudeɗiŋ ɓa, vi wən adawaŋgə. Awle, wanəɗɗa dəzzoŋgən əppu' ammba təlko, wasənnən na nəŋglukuko.

¹⁰ Vi kərmak əpel naw də əsok zuko, naw pak wanəguk pay na tatwãh məs dədazan aket ɗiy pak vi kawsle ɗiy naka dəlvafuŋgu.

¹¹ In tat əzzaw abe siɗikke. Arma an kərah ɓəlɓələ, vi ɗəf adawmõh suk mətərkiya nok ɓa.

¹² Məskəwəla na, wanəɗɗa dəsangən dədəka addəv gəla na Maŋgəlva nawa, agil na əmpa ɓa, wanəver iya na Maŋgəlva naw akani, gəm iya na walaŋgəla-metiŋ na Maŋgəlva nawa, Yerusalem meleketen dədawpirken sə disiŋ səza Maŋgəlva nawa, gəm iya naw meleketeni.

¹³ Ɗəf məs də sləman na, dəprəm an Əmpəs adawnah sit gəleɗe na Maŋgəlva.

Alabara sən gəla na Maŋgəlva na Lawdikiya

¹⁴ Aver sən maslay na gəla na Maŋgəlva na Lawdikiya: Aŋki an Amen adawpele, ndən Miziwe an təstəsə gəm an gərrakə, ndəni slalwãy zəga məs Maŋgəlva azəməɗə:

¹⁵ Nəsinik wəzaɗe noko; zay kənan ɓa, kãh kənan ɓa'a. Nəŋgəl kəta na kəsokgən zayə, awaniɓa kãh.

¹⁶ Ya vi kəsok lummo, məza zay awaniɓa kãh ɓa, wanəptekuk sə mawa.

¹⁷ Vi is tat ənah na: məsarya nənani, nəgəɗə arya, zəga tay məs wərayu azan ɓa, ya kəsən na, addəv əzəmsahã kənani, sãh kənani, məssãhã kənani, daŋgar kənani, gobbok mekeleŋ kənani ɓa.

¹⁸ Naw wanəppeteko, albah təbəz na meleŋge mədan də offo sə vawa, kəsokgən məsarya, gəm lukutɗe babarɗe nawgul azoko, vi wil nasso gobbok mekeleŋ adarbaŋ ɓa, gəm miya na hara ɗəfa kəɗɗagən aroko kuwəlgəni.

¹⁹ Naw ɗiy məs nəŋgəl pak in tat əhẽyeti, in tat əzga' siti. Asok də əŋgla nan a amkrok kan va offo, aɗimarava.

²⁰ Awla in tat ziwe a maddamba ərgani, an ɗəf aprəmək wəlawa, akoluk maddamba, wanətoŋ ananda, wanəzəm dəndən, wazəm də iyna.

²¹ Məskəwəla na, wanəɗɗa dəsangən də in aka mazaŋga na məlĩ nawa, va naw pak nəskəwəla nəmbat əssaw də Əbba aka mazaŋga na məlĩ nani.

²² Ɗəf məs də sləman na, dəprəm an Əmpəs adawnah sit gəleɗe na Maŋgəlva.