Hənhən 21 - Bible en Guidar

Disiŋ meleketeni, dəlvafuŋ meleketeni, Yerusalem meleketeni ( 21:1—22:5 ) Disiŋ meleketeni də dəlvafuŋ meleketeni

¹ Yaŋ nula disiŋ meleketeni, də dəlvafuŋ meleketeni. Disiŋ an daabəŋ də dəlvafuŋ an daabəŋ pak ahhiyaŋka, pehe pak tay ɓa azəka.

² Nulak walaŋgəla an salala, Yerusalem meleketen tay əprike sə disiŋ sə maŋgava Maŋgəlva zən sekke, va waŋ məzaɓan zət nambat a təki wəɓele.

³ Nəprəmək wəla ɗəf əzzan səka mazaŋga na məlĩ nak dayadaya adawnəh na: Təki nassa na Maŋgəlva aweleŋgit ɗiy yi! Wasan dənɗaŋgə, wassoŋ ka ɗiy nani, Maŋgəlva wasan Maŋgəlva dəsan dənɗaŋgə.

⁴ Wapay sit sin səret pakə, əmta asan na əmpa ɓa, wəhəm asan əmpa ɓa, wəska morkoyo ɓa, wəzəmsãhã ɓa. Vi zəgeɗ en farfar pak agrakaŋka.

⁵ Yaŋ ɗəf məs dəsan aka mazaŋga na məlĩ amna: In tat əɗɗa zəgeɗ pak meleketeti! Yaŋ aɓsu na: Aver na: Əpeləŋ gegesiŋgi gəm nawtafi.

⁶ Yaŋ anah su na: Agəɗək səkay grakə. Intə an daabəŋ wətəŋ nani, də an dirɓe pakə wəgrak nani. Ɗəf məs meme adaŋ pak wanəpsən iŋkile miyma na zeŋgile na mekeleŋ.

⁷ Ɗəf məskəwəla pak aski nədapsiti, wanəsaw Maŋgəlva nani, wasan wətuwa.

⁸ Ya ɗiy mədekti, məɓoŋti, məɗɗaŋ zəga an na henziŋ, mãy məbayaŋ ɗiyi, məkuhwaŋ a gizbe, məɗɗaŋ sekene, məzbetin zəgeɗkamaŋgəlva, məwaŋ tepelke pakə, net təki net na, ndəni pehe məs offo adawzla adak va muhurən, ndəni kan əmta an ma sula'ən.

Yerusalem meleketeni

⁹ Ɗəf taka sə waleŋgit maslayɗe buhul nek məs də makasli na bonoy buhul avet neki, an dirɓegeti ma buhulet nak ade nah su na: Ade nərbat sukut akən məs ndargayãk na Maŋgəlva adaŋgla wəɓel nakə.

¹⁰ Əmpəs na Maŋgəlva adek akawa, maslay nak akuwək aka gərəm məɓayən diyɗa. Arban suwək Yerusalem walaŋgəla-metiŋ, məs salala dəde səza Maŋgəlva ana disiŋ.

¹¹ Walaŋ gəla nan tay wiɗ də gagdak na Maŋgəlva, uwiɗ nan tay va gərəm na sləma, va gərəm məs adawyaŋ na yaspa kəɗeslkəɗesl va darawgal.

¹² Walaŋ gəla nan tay də zlava na dələv məɓayən, metive nan tay kəlaw kiyən sula, dit maslayɗe kəlaw kiyit sula məzu ganən mative nani. Məverini ma əlfa net Israyelɗe kəlaw kiyən sula aka mative nani.

¹³ Metiveɗ tahəŋ hoku ammba pay nampum, hoku tapaslay na dohoŋ, hoku tapaslay na disiŋ, hoku əmpa dəmmba pay na moskoyo.

¹⁴ Zlava na dələv nan məɗini gabban aket gərmeŋge kəlaw kiyit sula, aket gərmeŋge net məver iya net maslənɗe na ndargayã na Maŋgəlva kəlaw kiyit sula.

¹⁵ Maslay məzu pel su naka, tay də sulegere na meleŋge vi kawsla walaŋgəla-metiŋ dəndən dit metiveɗ nani də zlava na dələv nan pakə.

¹⁶ Təkzləm walaŋgəla van dakadakayi pakə, zezek nani də slosloprok pak məstakayi. Maslay nak aslak walaŋgəla nak də sulegere nan naka, zezek nan agəɗək metir uzine sula də səkat sula (2 200). Slosloprok nani, zezek nani də wəɓay nani məstakayi pakə.

¹⁷ Aslak zlava na dələv tamə, agəɗək metir kaklaw buhul kiyən sula (72) va an ɗiy adawslaŋ zəga.

¹⁸ Zlava na dələv nan mərkani dit gərmeŋge məs adawyaŋ na Yaspa, ya walaŋgəla zək nan na, mərkan də meleŋge an moggoni məzu wiɗ va darawgal.

¹⁹ Gaba zlava na dələv nan məbaysəni gawla dit gərmeŋge na sləma temtem diyɗa: An məɗiyən daabəŋ ndəni yaspa, sula nani Safira, hoku nani, agate, poɗo nani imaradi,

²⁰ sle nani onikis, sləre nani sardis, buhul nani kirisoliti, dədopoɗo nani gərəm manzakalnyakalnya, vaytak nani topas, kəlaw nani krisoparasu, kəlaw kiyən taka nani gərəm lipilare, kəlaw kiyən sula nani ametistu.

²¹ Metiveɗ kəlaw kiyit sula, ndəɗaŋgəŋ averzleɗ kəlaw kiyit sula. Metiveɗ məɗɗet də zev averzle taka, tive na walaŋgəla nan pak məɗɗani də meleŋge an moggoni məzu wiɗ va darawgal.

²² Nula gəla nakkam addəv walaŋgəla nan ɓa, vi Maŋgəlva Daya məs də gbogboŋ aka zəga pakə, ndəni gəla metiŋ nakkam na walaŋgəla vani, də ndargayã nani.

²³ Wəray tay na paya awaniɓa na təla ɓa, vi dəkasakgən a walaŋgəla nan ɓa, ndargayã na Maŋgəlva yi lalam na walaŋgəla nani.

²⁴ Ɗiy naka dələv pak wadawaŋ ara təki babar nani, məlyeŋge naka dələv wakinən arya net adaka.

²⁵ Pay pak metiveɗ na walaŋgəla nan tahəŋ viŋŋge, kampeti ɓa, vi dəfəɗ tayadak əmpa ɓa.

²⁶ Gagdak net ɗiy də arya net ɗiy na dələv, kawkani a walaŋgəla nani.

²⁷ Ya zəga an na mahenziŋ atoŋ na a walaŋgəla nan ɓa, ɗəf məzəppan kizən vi zəga mambray pak də məwə tepelke pak atoŋ na adak ɓa. Ɗiy məs nawtoŋgoŋ adak na, abbər ɗiy məs məver iya net addəv ɗerewel na zeŋgile nava ndargayã nak dədawtoŋgoŋ a walaŋgəla nani.