Hənhən 2 - Bible en Guidar

Alabara sən gəla na Maŋgəlva na Efesus

¹ Aver sən maslay na gəla na Maŋgəlva na Efesus na: Aŋki məs dərme ngərzleɗ buhul aza van dəzəŋ, məs dədadaw a weleŋgit zəgeɗ nawɗi lalamɗe na meleŋge buhul adawpele:

² Nəsinik wəzaɗe noko, əzəmsahã noko gəm zuk məs kədawsoko, nəsənka kəɓap na əzi horok sit məsdarawɗe ɓa. Kəslak nazet məzunahaŋ na maslənɗeŋ ya mbaraka maslənɗeŋ ɓa, kərəhək na məwaŋ wənəŋgə.

³ Kəsokuk zuko, kəzəmək sahã vi iya nawa, də as pak kəgeslne' ɓa.

⁴ Ya an nəzel azok na, kaŋgəlu gəgaŋ va kəŋgəlu maddaabəŋ ɓa.

⁵ Aɗɗumon kana, sə təki kəzə ki tive, aɗimarava, aɗɗa an məs kəgəɗ maddaabəŋ. Vas ɓa in tat əzzaw ərəhko, an kəɗimarava ɓa, wanəgəm zəga naɗi lalamɗe nok sə gəlani.

⁶ Ya an dədannek zu dənduk yaŋka: kəzelik wəza net Nikolawiɗe va nawa.

⁷ Ɗəf məs də sləman, dəprəm an məs Əmpəs adawnah sit gəleɗe na Maŋgəlva. Sən məskəwəla pak wanəpan dəzəmgən uwa na wəlaŋga na zeŋgile dəsan a təɗa aza Maŋgəlva.

Alabara sən gəla na Maŋgəlva na Samirna

⁸ Aver sən maslay na gəla na Maŋgəlva na Samirna na: Aŋki məs dəsan ətəŋga gəm əbayma zəga, məs dəmtə, dəsil səka əmta adawpele.

⁹ Nəsənək tatwãh noko gəm sãhã noko, ya məsarya kənani, nəsənək wən mbərayən məs ɗiy məzuɗinən zit va mə Yudeɗ adawpeleŋ akoko, ya mə Yudeɗiŋ ɓa, net ɗiy məzbanən Satan əŋgə.

¹⁰ Kədawgeslne' vi wakəzəmsãhã ɓa. Yaŋ na, Satan wazgə ɗiy nokum a fərsəna, vi kawla an nazokum, kawsərni mokum əvoŋ kəlawə. Aziw ɓəlɓəl hã is zamə, asna wanəpsuk mətərkiya na zeŋgile.

¹¹ Ɗəf məs də sləman, dəprəm an məs Əmpəs adawnah sit gəleɗe na Maŋgəlva. Məskəwəla pak azəmna sãhã na əmta masula'ən kpak ɓa.

Alabara sən gəla na Maŋgəlva na Pergame

¹² Aver sən maslay na gəla na Maŋgəlva na Pergame: Aŋki məs dəptu masalam məs man sulagən hoɓhoɓ adawpele:

¹³ Nəsənək a təki kəsoko, adaki mazaŋga na məlĩ na Satan asani. Ya kərmak iya nawa, aka pay məbay Antipas miziwe naw an gesiŋgesiŋ a nokumda zlaŋ, a təki Satan asani kəppan ətaf məs kətafu ɓa.

¹⁴ Ya in tat də an nədawzelen azok siɗikke, is tat dit ɗiy anokda məs dədazbanən wən məs Balam adawsəɓ sən Balak dəŋsləngən bizwil sit mə Israyelɗe vi kawreɗit dəzəmaŋgən slu nawzaɓ-Maŋgəlva sit zəgeɗkamaŋgəlva gəm dəɗɗaŋgən polkoyo də zə ɗəfa.

¹⁵ Anokda van əmpa na is tat dit ɗiy məzəzbanən zəga narba net Nikolawiɗe.

¹⁶ Aɗimarava kana, vas ɓa na in tat əzzaw abe aŋ siɗikke, wanəlpə dənɗaŋ dəndə masalam na mawa.

¹⁷ Ɗəf məs də sləman, dəprəm an məs Əmpəs adawnah sit gəleɗe na Maŋgəlva: Sən məskəwəla pak wanəpan manhu məɗamani, wanəpan gərəm babar məver iya meleketen akani, ɗəf tay nawsən iya van abbər ɗəf məs məpsən ɓa.

Alabara sən gəla na Maŋgəlva na Tiyatira

¹⁸ Aver sən maslay na gəla na Maŋgəlva na Tiyatira na: Aŋki an Wətən Maŋgəlva adawpele, ndən məs haran va hərzlum offo nzilimnzilimi, tələn va təbəz pepreŋ məzuwiɗe.

¹⁹ Nəsənək wəza noko, əŋgla noko, ətaf noko, wəza nok kədaɗɗa gəm zuk an kədawsoko; əŋɗa net wəzaɗe nok en meddirɓe adayaŋgək kiyit en maddaabəŋ.

²⁰ Ya an nəzel azok na, is tat əzi horok sət Zezabel, ndət guluk məzuɗi zət ka məskəleŋkə gəm məzuzet məɗɗaŋ wəza naw də ərban sit zəga dəɗɗaŋgən polkoyo gəm dəzəmaŋgən slu nawzaɓ-Maŋgəlva sit zəgeɗkamaŋgəlva.

²¹ Nəpəl sətək tive təɗigən marava, ya təŋgəm kawɗi marava aka polkoyo nat ɓa.

²² Vini wanəvoŋgət gbəgba'a, vaska'e nədawgəɗ sit məkuwaŋ a gizbe matak dəndəta, abbər an aɗiyaŋgək marava aket wəzaɗe nat məs adaɗɗaŋgə.

²³ Gewleɗ nat na, wanəbeye, gəleɗe na Maŋgəlva pak wasənnən na intə məkoson əɗɗumo gəm makret ɗiyi. Wanəfaɗsən naway di pak va azet wəzaɗe nani.

²⁴ Ya in tat ənah sukum munokum məs kəmbraŋ a Tiyatira, munokum məs kəzbanən iyakəs ɓa, məs kəkosonən əsən net məs adawɗiyaŋ azet ka «kpukpum» na Satan əŋ ɓa, in tat əɗi sukum zəga maɓɓan gagdak nawsla na gəgay ɓa.

²⁵ Mərma wən məs kərəhaŋ kaka ɓəlɓələ, hã gap in mili.

²⁶ Məskəwəla məs dərme wəzaɗe naw hã aza əgrak nan na, wanəpsən gagdak aket ɗiy-ɗarə,

²⁷ wake ama ətaɗ də zleŋge na təbza, waŋgrof va adaŋgrofoŋ mesteɓe na dəlva.

²⁸ Va naw van nərah gagdak səza Afuwa, wanəpsən ngərzla naba pumpumo.

²⁹ Ɗəf an məs də sləman, dəprəm an Əmpəs adawnah sit gəleɗe na Maŋgəlva.