Hənhən 16 - Bible en Guidar

Ŋgefleŋɗe buhul na ədagədəv na Maŋgəlva ( 16:1-21 ) Hiliŋgiɗ miknihit də ədagədəv na Maŋgəlva

¹ Yaŋ nəprəm wəla ɗəf əpel dayadaya səddəv gəla-na-Maŋgəlva ənah sit maslayɗe buhul nek na: Məddoŋ məgbo' wədagədəv na Maŋgəlva səddivit hiliŋgiɗ buhul nek aka dəlvafuŋ.

² Maslay maddaabəŋ mbat gbo' əggbo' ədagədəv na Maŋgəlva səddəvət huloŋguk nan aka dəlvafuŋgu. Yaŋ kurtiya mbəreyit məsanən ɗəf diyɗa armenin ɗiy məs də voɗoko na zəga mamayã azet məzugagdakanən zeŋgilen neki.

³ Maslay masula'ən gbo' əggbo'ət huloŋguk nan aka pehe: pehe kpaŋ va mbel na ɗəf məmtəni, zəga məzəmpəs na pehe pak amtəka.

⁴ Maslay mohoko'it gbo' əggbo'ət huloŋguk nan aket məlpeŋge də aket iŋkile miyma temtemi: ndəɗaŋ kpaŋgaŋ mbeli.

⁵ Yaŋ nəprəm maslay məs də gagdak aket iŋkile dawnəh na: Təstəs kənani, is məs kəsok kakaŋka va kəsok lahəŋka, vi təstəs kənan addəv ətawwən noko.

⁶ Adan agbo'inik mbel net ɗiy na Maŋgəlva, dit mbel net məskəleŋɗe, mbeli'e kəpsit ka nawsa. Aslə sitike!

⁷ Yaŋ nəprəm wəla ɗəf sə matuya dawnəh na: Vaski Daya məlĩ Maŋgəlva, ətawwən nok aknahək də gegesiŋ gəm də testəsə.

⁸ Maslay mapoɗo'it gbo' əggbo'ət huloŋguk nan aka paya: məpsəni tive sən pay dəzlegin ɗiy də offo nani.

⁹ Ɗiy azlaŋgək də kəɓakkəɓak nani; aranənək iya na Maŋgəlva ndən məs də gagdak aket tatwãhɗeski, dəɗiyaŋ marava kawgagdakan dərəŋ ɓa.

¹⁰ Maslay masle'it gbo' əggbo'ət huloŋguk nan aka mazaŋga na məlĩ na zəga mamayã naka: Guzli titir agəɗək aka məlĩ nan pakə. Ɗiy aharnənək hərzlumit sən əzəmsãhã,

¹¹ aranənək Maŋgəlva na disiŋ sən əzəmsãhã neti gəm sit kurtiya neti, ya dəɗiyaŋ marava aket wəzaɗe net ɓa.

¹² Maslay masləre'it gbo' əggbo'ət huloŋguk nan a məlpa metiŋ na Efrat: Iŋkile kpa'aŋgə vi kawzaɓan tive sit məlyeŋge məzəzzoŋ səmmba pay nampum.

¹³ Yaŋ nule əmpəsɗe mbəreyit hoku əgilyoŋ va oŋgornekeɗ səma zəga darawən, səma zəga mamayã naka, gəm səma məskəleŋ məwə tepelke.

¹⁴ Es vet əmpəsɗe dəzzoŋ səza Satan əŋgə. Tay əɗɗaŋ sekeneɗi gəm əddoŋ azet məlyeŋge nammba dələv gboŋgu, kakelet kaɗɗa əlpa də pay metiŋgin na məlĩ Maŋgəlva.

¹⁵ Awle, in tat əzzaw va məhãla. Əzaɓi aza ɗəf məzəzga sləma gəm məzuge lukutɗe nani, vi adawdaw zən mekeleŋ wil nan karbaŋ ɓa.

¹⁶ Əmpəsɗe vet akkeletinik a təki məs adawyaŋ də ma Ibriɗ na Harmagedon.

¹⁷ Maslay mabuhulet gbo' əggbo'ət huloŋguk nan a disiŋ, yaŋ wəla ɗəf agil səddəv gəla-na-Maŋgəlva dayadaya əzzan səba mazaŋga na məlyã. Tay ənah na: Agəɗka səkayə!

¹⁸ Yaŋ buwən awiɗi, geŋgere agəɗka, buwən ahayə, yaŋ dəlvafuŋ aɓəl gəddakə, zeŋvi dəgəɗ ɗah ɓa təŋ səza ɗiy assoŋ aka dəlvafuŋgu.

¹⁹ Walaŋ gəla-metiŋ aŋgarək təɓələn hoku, walaŋgəleɗe-gugriɗ net ɗiy-ɗar azaŋka. Maŋgəlva aɗɗumonək walaŋgəla-metiŋgin Babilon, vi kapsən huloŋguk məs mbazla na ədagədəv nan adawgəbəɗ addəvta.

²⁰ Mətuwəraɗe diyɗa dit massorgeɗe pak azaŋka.

²¹ Ɓeɓrezleɗ gugriɗe abətaŋgək sə disiŋ aket ɗiyi. Ɗiy aranənək Maŋgəlva sawɓa, vi əzəmsãhã sit ɓeɓrezleɗi, vi əzəmsãhã nan nawgeslne səni sawɓa.