Hənhən 15 - Bible en Guidar

Maslayɗe gəm tatwãhɗe en madidirɓe

¹ Nulak sekene maɓɓan metiŋgin gəm nawgəɗ sən gərəŋ a disiŋ, maslayɗe buhul dit tatwãhɗe en madidirɓe avet buhul faɗə, vi addivti ədagədəv na Maŋgəlva adaknaha.

² Nulak pehe va darawgal məslahan də offo, ɗiy dəskanən wəla zəga mamayã, zeŋgileni gəm əŋɗa na iya nan nek tahəŋ ziwziw də gəzləŋtəndəŋ na Maŋgəlva aveti.

³ Tahəŋ wəyaŋ gəlya na Moyis məgəɗ wəza na Maŋgəlva, gəm gəlya nat ndargayãkə na Maŋgəlva, ənahaŋ na: Wəzeɗe nok gugriɗəŋ, nawsimiŋgə, Daya məlĩ Maŋgəlva. Tiveɗ nok təstəsəŋ gəm gegesiŋgəŋ, Məlĩ net ɗiy-ɗarə.

⁴ Naway məs ageslne' suk na ɓa, agagdakan na iya nok ɓa di Daya? Vi istə salala kaka'ə, ɗiy-ɗar pak wazzoŋ əppu' aboko. Vi wətaw wən nok temtem arbəka.

⁵ Sə dərɓaga aska, nəwəlka: gəla na Maŋgəlva məs akoti na wənmiyna na Maŋgəlva addəvən akoluk a disiŋ.

⁶ Maslayɗe buhul məs dit tatwãhɗe avet buhul nek agulyoŋguk səddəv gəla na Maŋgəlva, aguloŋguk lukutɗe azet na ngərayã kukulfut məzuwiɗeŋgi, aynanənək dadakit də maslapa na meleŋge.

⁷ Taka səret zəgeɗ memeyẽɗ nek apsitik hiliŋgiɗ na meleŋge buhul sit maslayɗe buhul neki, məknehit də wədagədəv na Maŋgəlva dəsan madaran hã faɗə.

⁸ Yaŋ enene aknəhnən gədəv gəla-na-Maŋgəlva sən gagdak na Maŋgəlva gəm sən əɓap nani. Ɗəf tay nawɓap ətoŋ addəv gəla-na-Maŋgəlva ɓa hã an tatwãhɗe buhul net maslayɗe buhul nek aɗɗaŋka.