Hənhən 13 - Bible en Guidar

Zəga mamayã dawgilyen sə pehe

¹ Yaŋ nula zəga mamayã dawgilyen sə pehe, kiyən buhul gəm mohon kəlaw, mohon kəlaw pak tahəŋ də mətərkiya aketi, iya tay mbərayən nawran Maŋgəlva məverin aka kiyən taka taka pakə.

² Zəga mamayã məs nuwəl van agilik va balgam, tələn agilik va təl zəga adawyaŋ Ursə, man agilik va ma ɓoolu. Dohõtuya apsənək əɓap nani, mazaŋga na məlĩ nani gəm gagdak metiŋgini.

³ Taka na ki zəga mamayã nak arahək vaŋvi namta, ya vaŋvi nan anzaɗka. Ɗiy naka dəlvafuŋ pak aggətaŋka, azbanənək zəga mamayã naka.

⁴ Yaŋ adawɗinən ki dohõtuya naka vi apsənək gagdak sən zəga mamayã, yaŋ adawɗinən ki zəga mamayã nak dawnəh na: Naway nawsla də zəga mamayã gəm naway nawɓap əlpa dəndən di?

⁵ Zəga mamayã arahək tive nawpel wən na əgagdakan zəni gəm əran Maŋgəlva, arahək gbogboŋ naɗɗa vas hã gap təla kaklaw poɗo kiyən sula (42).

⁶ Yaŋ akol man əran Maŋgəlva, əran iya nani, təki məs adawsani, gəm ɗiy en məs təki nassa net asan a disiŋ pakə.

⁷ Arahək tive nawgay dit ɗiy na Maŋgəlva gəm naska wəleti, arah gagdak aket mahəlfaɗe pakə, aket ɗiy pakə, aket maɗe pak gəm aket ɗiy-ɗar pakə.

⁸ Ɗiy naka dəlvafuŋ pak wagagdakanəni, anet ɗiy en iya net tay məverin addəv ɗerewel na zeŋgile nat ndargayãk mətaw wəlat də ətəŋ na gabba dəlvafuŋ ɓa.

⁹ Ɗəf məs də sləman dəprəma.

¹⁰ Ɗəf məs məpsən nadda aka balamə, wal aka balamə, ɗəf məs məpsən namta ama masalam, wamtə ama masalam. Pay na əsok zə ɗəfa gəm na ətafi azet ɗiy na Maŋgəlva.

¹¹ Yaŋ nula zəga mamayã maɓɓan əgilyan sə fuŋ, tay də mohon sula va ndargayãkə, ya ndən əpel na va zəga darawən.

¹² Tay ərban gagdak na zəga mamayã an maddaabəŋ nak gərak ama harani. Tay əɗɗa dəlvafuŋ dit ɗiy nakan pak dəgagdakanəngən zəga mamayã maddaabəŋ məs vaŋvi nan namta anzaɗ naka.

¹³ Tay əɗɗa zəgeɗ naggət aket gagdakɗe diyɗa, hã gap əprikgin offo sə disiŋ aka dəlvafuŋ ama heret ɗiy pakə.

¹⁴ Tay əmbəɗet ɗiy naka dəlvafuŋ pak də tive məs məpsən naɗɗa sekeneɗ ama hara zəga mamayã maddaabəŋ naka. Tay əhheɗet ɗiy dəɗɗaŋgən zeŋgile zəga vi kawgagdakan zəga mamayã məs də vaŋvi na masalam azan dəmbəl naka.

¹⁵ Arahək tive naɗɗa ka zeŋgile zəga mamayã nak dəpelgəni gəm nawbay ɗəf awandi pak məs awgagdakan zeŋgile zəga mamayã nak ɓa.

¹⁶ Ɗiy pakə, kirin memeɗeŋge, ɗiy gugriɗe, məssẽhẽŋɗe, ɗiy na kiyti, belemɗe, zəga mamayã nak tay əgəɗ sit vavyak naɗɗa sit voɗoko aza vet dəzəŋ awaniɓa a mirbizti.

¹⁷ Ɗəf tay nawɓap əlbəh zəga awaniɓa əvəl zəga an voɗoko tay azan ɓa ɓa, ana iya na zəga mamayã awaniɓa əŋɗa na iya nani.

¹⁸ Pay nawsən uɗakan wəni. Ɗəf an də əsəna dəboton əŋɗa na zəga mamayãŋka, vi əŋɗa van iya na ɗəfi, əŋɗa van tay səkat sləre də kaklaw sləre kiyən sləre (666).