Hənhən 12 - Bible en Guidar

Zəga darawən gəm zəgeɗ memeyẽɗ sula ( 12:1—13:18 ) Gulku, dohõtuya gəm wiyna

¹ Sekene metiŋgin arbək a disiŋ: Guluk tatə, təgul pay azat ka lukutu, təla tay ammba təlta, ngərzleɗ kəlaw kiyit sula ka mətərkiya akata.

² Guluk vat dədawaytə, tat əɓuh man sən əɓay uwa gəm əssa na uwa.

³ Sekene maɓɓan arbək a disiŋ əmpa. Zəga darawən metiŋgin pepreŋge, kiyən buhul, mohon kəlaw, mətərkiya aka kiyən nak taka taka buhul pakə.

⁴ Yaŋ aptiw taka səddəv əprasl hoku net ngərzleɗ sə disiŋ də kuturun əzget afuŋ, yaŋ ade əziw abat guluk məs tədawɓay uwa nakə, vi kampər wəyin van an agilik ləŋgə.

⁵ Guluk nak tuwək wiyən mizilin, məs dədateɗ ɗiy naka dələv pak də zleŋge na təbəza. Yas məslan wətət van aza Maŋgəlva aza mazaŋga na məlĩ nani.

⁶ Yaŋ guluk nak tənzat awra, a təki məs Maŋgəlva azaɓ sət adaka, kawzəmgət adak əvoŋ gabal də səkat sula də kaklaw sləre.

⁷ Yaŋ wəgay agəɗ a disiŋ. Mika dit maslayɗe nan tahəŋ wəgayaŋ də Dohõtuya, Dohõtuya tam tay əgay dənɗaŋ dit maslayɗe nani.

⁸ Ya Dohõtuya dərah wəskawəla ɓa, nan dərəhaŋ təki nassa a disiŋ əmpa ɓa.

⁹ Yaŋ məslaŋgan Dohõtuya nak a gizbe, ndəni dohõ məgalən, məs adawyaŋ na Diyabəl awaniɓa Satan, məzumbəɗet ɗiy na dələv gboŋgu. Məslaŋgani aka dəlvafuŋ sap dit maslayɗe nan pakə.

¹⁰ Yaŋ nəprəm wəla ɗəf sə disiŋ dayadaya məzunah na: Pay nawkõh yaŋka, na əɓapa, na əzəm məlĩ na Maŋgəlva namə gəm na gagdak na Kristu wətəni; vi məslaŋgani məzəmkiyit milmiŋgiɗmə, ndən məzəmkiyit aza Maŋgəlva nam dəfəɗ də kapay pakə.

¹¹ Ya milmiŋgiɗəm veti, askanənək wəlan dit mbel nat Ndagayãkə gəm də əpel məs apeleŋ akani. Dəŋgluwən ənziya egge net hã gala ndəɗaŋ nawgeslne' sən əmta ɓa.

¹² Vi vaski mənneken zukum, mənokum, disiŋ dit ɗiy dəssoŋ addəvən. Əray akokum dəlvafuŋ də pehe, vi diyabəl aprikik kəlazokum gədəvən mədan sit herɗe, vi asənək na ənziya siɗikke dəpəl səni.

¹³ Adan Dohõtuya awla na, məslaŋgani aka dəlvafuŋ, ndən ɗoɗos əzbat guluk məs tuwə wiyən mizilin aka dələv nakə.

¹⁴ Yaŋ məpsət persleke sula va na gazla metiŋgin sət guluk nakə, vi təveŋgən əmbat a kapta-muyã, a təki məzaɓan ammbat vi kawzəmgət adak faraɗa səza dohõ, zəga na əzva hoku də mani.

¹⁵ Ndəni dohõ apor iŋkile sə baran va məlpa ammbat guluk nakə, vi guzlo dəkətəgəni.

¹⁶ Yaŋ dəlvafuŋ abbah sət guluk nakə, dəlvafuŋ akoluk mani, asɗək məlpa məs Dohõtuya apor sə baran naka.

¹⁷ Addivit herɗe nan akat guluk nakə, dohõtuya akak əlpa də madembirgit kirtita, en dədazbetin mahenziŋɗe na Maŋgəlva gəm dərmanən əpel na Yesu.

¹⁸ Siske na dohõtuya nak aka hoyoŋko na pehe ziwi.