Hənhən 11 - Bible en Guidar

Məziweɗe sula na Maŋgəlva madarani

¹ Yaŋ məpsu pəɗəma məs dəgil va zleŋge, kawsla zəga dəndən, yaŋ mənah su na: Asili, asla gəla-na-Maŋgəlva gəm gəlamatuya, aŋɗet ɗiy məzugagdakanən Maŋgəlva addəvən.

² Ya kədawsla daŋgla na gəla-na-Maŋgəlva van ɓa, vi məpsiti avet ɗiy məs dəsənən Maŋgəlva ɓa, dəmõhəngən walaŋgəla-metiŋ an salala hã gap təleɗe kaklaw poɗo kiyən sula (42).

³ Wanəslin miziweɗe naw sula, dəɗɗaŋgən kəleŋ də lukut na gəlabay azet zəga na əvoŋ gabal də səkat sula də kaklaw sləre (1 260).

⁴ Məziweɗe suleŋki, ndəɗaŋgəŋ heremeɗi gəm təki nawɗi lalamɗe sula aba Daya naka dəlvafuŋ.

⁵ An ɗəf tay əŋgla əgəɗ sit mbərayən, offo əgilyen sə bereti əzet məzuzelɗe neti. Gesiŋ an ɗəf tay əŋgla əgəɗ sit mbərayən, vaski adamta.

⁶ Net tahəŋ də gagdak namsan ma disiŋ, buwən adawzi kof aka pay məs kəleŋ net atak ɓa. Tahəŋ də gagdak nakkpeŋget iŋkile ka mbeli gəm narga dəlvafuŋ dit gəbayɗe təl ɓəɓay gba va aŋglaŋgə.

⁷ Ya an agrakənək ərban wən na Maŋgəlva, zəga mamayã məs dədawgilyen sə delŋgeɗek wagay dənɗaŋ, waska wəleti gəm wazeti.

⁸ Gəbay net wasan aka tive na walaŋgəla-metiŋ, məyan də kəleŋ na Sodom gəm Eziptə, a təki məs məkkpa Daya net aka məzliwrihe.

⁹ Ɗiy diyɗa, mahəlfa temtem, maɗe temtem gəm ɗiy-ɗar wazzoŋ vi kawla kigəbeyit zəga na əvoŋ hoku də mani, məza əndikit ɓa.

¹⁰ Ɗiy naka dəlvafuŋ wannekenən zit də əmta neti. Wassoŋ addəv ənneke, də əɗɗa əvəl a walaŋ ziti, vi məskəleŋɗe suleŋ akiyaŋ sitinik tatwãh diyɗa sawɓa.

¹¹ Ya sə dərɓaga əvoŋ hoku də manəska, əmpəs na zeŋgile dəde səza Maŋgəlva, toŋ addəvti, ndəɗaŋ le' ziwi, ɗiy dulenin pak geslne armet sawɓa.

¹² Yaŋ məskəleŋɗe sula net aprəmən wəla ɗəf sə disiŋ də dayadaya ənah sit na: Məpeŋ aŋka. Yaŋ apeŋgeŋ a disiŋ kəladdəv slaybuwən ama heret məzuzelɗe neti.

¹³ Addəv ənziya vanəska'e ləŋ dəlvafuŋ aɓələk dayadaya, yaŋ taka səddəv əprasl kəlaw na walaŋgəla-metiŋ aɓəslə, ɗiy gabal buhul dəmtaŋ addəv wəɓla na dələv nani. Ɗiy məs dəplaŋ pak ageslen'eŋgək sawɓa, agagdakanənək Maŋgəlva na disiŋ.

¹⁴ Əzəmsãhã masula'ən atoŋguk vaska, ya əzəmsahã mahoko'ən yaŋ əzan abe siɗɗike.

Maslay mabuhulet tay əffon gozloro

¹⁵ Maslay mabuhulet affon gozloro nani: Yaŋ wəlet ɗiy diyɗa ade sə disiŋ dawnəh na: Əzəm məlĩ naka dəlvafuŋ na Daya nami gəm na Kristu nani kakaŋka; wazəm məlĩ hã faɗə.

¹⁶ Ɗiy məsɓet kaklaw sula kiyit poɗo məs tuŋtuŋ aka mazaŋga na məlĩ net aba Maŋgəlva, akdukoŋ mirbizit afuŋ nisi, agagdakanən Maŋgəlva

¹⁷ də ənah na: Mənam tat əgəɗ suk əsoko Daya Maŋgəlva metiŋ, is məs kəsok kəkaŋka gəm lahəŋka, vi kərbanək əɓap nok metiŋgini, kəɗiyək əzəm məlĩ noko.

¹⁸ Ɗiy adaŋgək gədəva ya ədagədəv nok dədarban zəni. Pay nawtawwən aket ɗiy mimtit agapka, pay nawrəh zəga na vet məɗɗaŋ wəza nok məskəleŋɗe, ɗiy salala, gəm en məzugeslne'eŋ sənən iya noki yi, muzliya də ɗəf metiŋgin pakə, pay an nawzet ɗiy en dədawraygənən dəlvafuŋgi yi.

¹⁹ Yaŋ gəla na Maŋgəlva akol a disiŋ, yaŋ akoti na wənmiyna arban zən addəv gəla na Maŋgəlva naka, buwən awiɗke, geŋgere agəɗka, buwən ahãyka, dəlvafuŋ aɓəlka, ɓeɓrezleɗ aɗɗaŋgək diyɗa.