Hənhən 10 - Bible en Guidar

Maslay dət ɗerewelək muzliyəkə

¹ Yaŋ nula maslay gagdak maɓɓan dawpriken sə disiŋ. Məzəɗ slaybuwən akani, də məzzəɗa akani, haran tay va paya, tələn tay va dədəka na offo.

² Ɗerewelək muzliyək məkolət tat avani, yaŋ azlak tələn dəzəŋ aka pehe, tələn zlaɓay tam aka dəlvafuŋ.

³ Yaŋ aŋgəsl vaŋvəl dayadaya va ɓoolu dawbay gagay. Səza aŋzla vaŋvəla, wəhãy na buwən buhul azləndəmək diyɗa.

⁴ Adan wəhãy na buwən buhul agrak wəpel nani, nəzaɓanək zu kawverin, yaŋ nəprəm wəla ɗəf sə disiŋ dawnah su na: Arma wən na wəhãy na buwən buhuliŋki kədaverin ɓa.

⁵ Maslay məs nuwəl ziwwe aka pehe də aka dəlvafuŋ naka, aslanək van dəzəŋ a disiŋ,

⁶ yaŋ asway də iya na Maŋgəlva məs madaran hã faɗə, məs dəzəməɗ disiŋ də zəga naddəvən pakə, dəzəməɗ dəlvafuŋ də zəga naddəvən pakə, məs dəzəməɗ pehe də zəga naddəvən pakə. Yaŋ amna: Pay tay dəmbər əmpa ɓa.

⁷ Ya pay an adaprəmnən maslay mabuhuleti, pay adawtəŋ əffon gozloro nani, asna Maŋgəlva waknahan wən məɗama nan dəpaska, va anah sit məɗɗaŋ wəza nan məskəleŋɗe.

⁸ Yaŋ wəla ɗəf məs nəprəm dəde sə disiŋ nak apel su əmpa anah na: Dok ətafət ɗerewelək mukolət səva maslay məs dəziw aka pehe də aka dəlvafuŋ ndaka.

⁹ Yaŋ nəmbat aza maslay naka, nəssohon dəpsuwətgən ɗerewelək muzliyak nakə. Yaŋ aɓsu na, agəmta, azəmta, watəsat tərrah addəvko, ya aza mok na watəsat gənɗət va amama.

¹⁰ Nəgəmtək ɗerewelək nak səva maslay, nəzəmtəka, gənɗəttə amaw va amama, ya adan nəsɗəkta, təkkpaŋgək tərrah addəvwa.

¹¹ Yaŋ mənah su na, aslək kəgəɗgən kəleŋ əmpa sit ɗiy naka dələv pakə, sit ɗiy-ɗarə, sit maɗe temtemi gəm sit milyeŋɗe diyɗa.