Haggay 2 - Bible en Guidar

Əpel nassa təstəsə gəm nawga zəga aza Maŋgəlva ( 2:1-23 ) Lalaw na gəla na Maŋgəlva meleketeni

¹ Addəv əvoŋ kaklaw sula kiyən taka na təla mabuhulon wəzva masula'ən na Dariyus aka məlyã, Yawe anah sənək məskəleŋ Hagay na:

² «Apel sən Zorobabel wətən Salatiyel guverner na Yuda gəm sən Yosuwa wətən Yosadak, daya net məsdəlveŋge də madembirgit ɗiy pak anah sit na:

³ Səmmbokum mənokum məs kəndəwəɗaŋ na, naway məs dula gəlaŋ addəv gagdak an assan lahəŋ di? Ya mbar kədawlanən kakaŋ di? Tay ərba a mahorokum na va zəga na sləmay ɓa ɓa sa?

⁴ Ya kakaŋ na Yawe aɗiymani, asok zuko Zorobabel, ya asok zuko Yosuwa wətən Yosadak, daya net məsdəlveŋge, mənokum ɗiy pakə Yawe aɗiyman na məsok zukum aza wəza! Vi in tat dəndəkum Yawe Məzuɓappak aɗiymani.

⁵ Va niynan a makraw nawgəɗ sukum gala əgilye nokum səka dələv na Eziptə, adan əmpəs naw tay a walaŋkum kədawgeslne'eŋ ɓa!

⁶ Vi vaŋki Yawe Məzuɓappak apeli: abe siɗikke na wanəɓlan disiŋ gəm dəlvafuŋ, məlpa gəm dələv məklakani.

⁷ Wanəɓlet ɗiy-ɗar pakə, arya net ɗiy-ɗar pakə wade, wanəknah gəlaŋ də lalawa, Yawe Məzuɓappak aɗimani.

⁸ Təbəz babara nawiyə, meleŋge nawiyə. Yawe Məzuɓappak aɗiymani.

⁹ Gagdak na gəlaŋka gəgaŋkəŋ waday ki an maddaabəŋ Yawe anahə, wanəɗi zazay naw aŋka Yawe Məzuɓappak aɗiymani.»

Ɗiy tahəŋ də heslepe

¹⁰ Əvoŋ kaklaw sula kiyən poɗo na təla ma vaytakan na wəzva masula'ən na Dariyus aka məlyã, əpel na Yawe ade sənək məskəleŋ Hagay də wənah na:

¹¹ «Vaŋki Yawe Məzuɓappak apeli: Əŋga attokon met məsdəlveŋge aka an naɗɗa də wənah sit na:

¹² An ɗəf akak slu na matuya a ma lukut nani yaŋ slu səma lukut van arəŋgən peŋ, teɓi, mbazla, mẽlẽ, awaniɓa zəga awandi nawzəm pakə, zəgeɗ vet wassoŋ salala sa?» Məsdəlveŋge azlanən na: «Awwo».

¹³ Hagay amsakək ənah na: «An ɗəf dərnok zən də ərəŋgən kigəbay ane'ik aza taka net zəgeɗiski, zəga van wasan salala sa?» Məsdəlveŋge azlanən də wənah na: «Zəga van wasan salala ɓa.»

¹⁴ Hagay azlanəka amna: «Vaskəŋ ɗiyəŋki, vaski dəlvəŋ assani Yawe aɗiymani. Vaski zəga an adaɗɗaŋ də veti, an adawkiyaŋ suwən pak də heslepe yi.»

Təŋ dəpaŋka məssoŋ ɗeŋge

¹⁵ «Ya kakaŋ na, məssoŋ ɗeŋge, təŋ dəpaŋka gəm sən an nabe. Tak əzleɓet gərəmeŋge ərka gəla na Yawe,

¹⁶ miy dədawrəhkumuŋ di? An ɗəf ambatək a mahã wəkay haykəmari, wəsla kaklaw sula na ndən ərah wəsla kəlawə; an ɗəf ambatək wəmbaɗ mbazla məɗawa kaklaw sle səddəv hiŋziw na ndən ərah kaklaw sula.

¹⁷ Nəraygənək wəza na vokum, də wəslən muŋgus, doŋgoyoŋ gəm ɓeɓrezleɗi, ya kəmulyoŋ azaw ɓa, Yawe aɗiyman na.

¹⁸ Məssoŋ ɗeŋge təŋ dəpaŋka də əmbat abe, təŋ səza əvoŋ kaklaw sula kiyən poɗo na təla ma vaytakani, təŋ səza əvoŋ mətəŋ gabba gəla na Yawe, məssoŋ ɗeŋge.

¹⁹ Zeŋve tay dəpəl a maha əmpa ɓa, vaski ɓa sa? Megezlembirke, sokoyo, tonzoku gəm hereme dayday duwaŋ ɓa. Ya təŋ dəpaŋka wanəɗɗa əzaɓa.»

An Yawe aynan nawgəɗ sən Zorobabel məwele nani

²⁰ Əpel na Yawe ade sənək Hagay masula'ən də əvoŋ kaklaw sula kiyən poɗo na təla van də wənah na:

²¹ «Apel sən Zorobabel guverner na Yuda, anah sən na: Wanəɓlan disiŋ gəm dəlvafuŋ.

²² Wanəslaŋgən mazaŋga net milyeŋge gəm wanəzan gbogboŋ net məlĩyeŋge net ɗiy-ɗarə; wanəsleŋget mawteɗ nawgay dit məzuŋkoretini; pilseŋge wamtaŋgə, ɗiy məŋkoroŋ pilseŋge wabayanən ziti.

²³ Yawe Məzuɓappak aɗiyman na, pay nani, Zorobabel wətən Salatiyel, gawla nawa, wanəgəmko Yawe aɗiymani. Wanəɗiyuk va tampoŋ vi anok nəweli, Yawe Məzuɓappak aɗiymani.»