Haggay 1 - Bible en Guidar

Wən məɗiyən namsak wərka gəla na Maŋgəlva ( 1:1-15 ) Pay namsak ərkan gəla na Maŋgəlva

¹ Wəzva masulan na Dariyus aka məlyã, aka əvoŋ maddaabəŋ na təla masləre'ən, Maŋgəlva aslənək məskəleŋ Hagay əpel sən Zorobabel wətən Salatiyel, Guverner na Yuda gəm Yosuwa wətən Yosadak, daya net məsdəlveŋge na:

² Vaŋki Yawe Məzuɓappak apeli: ɗiyiski tahəŋ ənahaŋ na: Pay narka gəla na Maŋgəlva dəgap tagayɗa ɓa.

³ Ndəni Yawe aslən məskəleŋ Hagay ka dəpelgin vaŋka:

⁴ Nokum kan na pay nasso nokum addivit gəleɗe məzeɓet mogget aka gəlaŋ tay məɓzluwənəŋ sa?

⁵ Ya kakaŋ na, Yawe Məzuɓappak amna: Məɗɗumon ənziya nokum.

⁶ Kəzlgaŋgək diyɗa, ya məkkalan nan siɗikke kərahaŋgə; mənokum tat əzəmaŋgə ya kawbaŋ ɓa; mənokum tat əsaŋgə ya zukum appar ɓa; mənokum tat əguloŋgu ya zukum akkpaŋ kãh ɓa, ərah na məgəɗ wəza tay əmbat addəv taɓak mətilik gabbani.

⁷ Vaŋki Yawe afən gagdak apeli: Məɗɗum moggon aka ənziya nokum.

⁸ Yawe amna, məpeŋ aka mossorgo metiŋgini, məki wəleŋɗe, məmsak ərka gəla nawa: wanənan neki gəm wanərban gagdak nawa.

⁹ Mənokum tat əganən ka kərahaŋgən diyɗa, ya an məkkalən nan tay siɗikke: səza kəkannən eŋgil anokumda nəffu'uk səmyã akani. Vimi di? Yawe Məzuɓappak aɗiyman na: vi gəla nawa nan tay məɓzluwən, naway pak tay ətatrak aka ərka gəla nani.

¹⁰ Vini kana disiŋ appet minɗe dəziyaŋgən ɓa, dəlvafuŋ tamə awa zəga moggon ɓa.

¹¹ Nəɗɗak koloy aka dəlva, aket mossorgoɗe gugriɗe, aka haykəmari, aka mbazla na meketepe, aka mẽlẽ gəm aka zəga na mabardaw pakə; aket ɗiyi, zəgeɗ memeyẽɗi də aka ərah na wəza nokum pakə.

¹² Ndəni Zorobabel wətən Salatiyel gəm Yosuwa wətən Yosadak daya net məsdəlveŋge də medembirgit ɗiy pakə aprəmən an Yawe Maŋgəlva net apeli, gəm əpel na məskəleŋ Hagay, va Yawe Maŋgəlva net asləna. Yas ɗiy ageslnesənən Yawe.

¹³ Yas Hagay maslən na Yawe apel sit ɗiy va Yawe anah səni: Vi Yawe aɗiyman na: «In tat dəndukum.»

¹⁴ Yawe afɗahanək Zorobabel wətən Salatiyel, guverner na Yuda addəv əɗɗum nani gəm Yosuwa wətən Yosadak daya net məsdəlveŋge, gəm maɗɗulet ɗiy en dəppaŋ pakə: Azzoŋko, atəŋgən wəza addəv gəla na Yawe Məzuɓappak Maŋgəlva neti.

¹⁵ Də əvoŋ kaklaw sula kiyən poɗo na təla masləre'ən addəv əzva masula'a na Dariyus aka məlyã.