Habakuk 2 - Bible en Guidar

¹ Wanəziw ɓəlɓəl a gəla təki nawga nawa, wanəsaw ziwwe aka zlava mərkani. Wanəsekeɗ kawla miy adawpel akaw gəm va mbar adawzlan ama əhəm naw di?

Əzlan na Maŋgəlva: ɗəf təstəs gəm məsər ma ɗəfa

² Yawe azlan suka, amna: Aver ula, aboton aket kalaɓɗe, ka ɗəf dəŋɗetgən ta'ta'ə,

³ Ula maɓɓan əmpa aka pay an məziwgini. Siɗikke dəpəl dəgəɗgəni, wawə wən ɓa an aliyka, aga, vi sessel wade, aliy na ɓa.

⁴ Yaŋ ɗoŋgoy ɗoŋgoyu, əssa nan tay sarra ɓa, ɗəf təstəs də ətaf nan wasan madarani.

⁵ Sessel mbazla məzəmkiya yi: ɗəf məɗi kiyzən awsan a gəlan ɓa, ndən əkol wəlan va təki net ɗiy mimtiti, awba ɓa va əmta. Akkeletik dəlveŋge pak ka nani, akinik ɗiy pak azani.

Wərəh net məs dətafaŋ ɓa ( 2:6-20 )

⁶ Ya ɗiyis pak anahaŋ na mamba akan may wəsarnən dəsar nassa ɓa sa? Kawnəhĩ na: Wəray aka ɗəf dəkkal zəga məza nani ɓa! Hã pay gbəŋgbar adappan əklak dəmən gagdak akan di?

Ətəlma aka wən na tatwãha

⁷ Məzəzbokun dəmən asilyoŋ na akok də kakara ɓa sa? En nawtəŋgəlokən afɗahaŋ na, ka kakkpaŋgok zəga na popoho ɓa sa?

⁸ Vi kəppohetik dəlveŋge diyɗa, madembirgit ɗiy wappohokuni, vi kəziyək mbel net ɗiyi, vi gagay kəgəɗ aka dəlva, gəm aka walaŋgəla-metiŋ dit ɗiy naddəvən pakəŋka.

⁹ Əray aka ɗəf məndəreh əndəreh mbərayən vi gəla nani, vi kawzaɓ gəla nan a disiŋ vi kawkõh səmmba va ɗəf mbərayən.

¹⁰ Ərba wili yi kəki aka gəla noko: də əbay ɗiy diyɗa, mambray aka zuk kəgəɗə.

¹¹ Vi gərəm səza gəla mərkan waŋgəzl vaŋvəla, bəlaŋ na biyən wazlan səni.

¹² Əray aka ɗəf məmpə walaŋgəla-metiŋ aket mbeli, dəmpə kigəla də vurum!

¹³ Wən nan səza Yawe Məzuɓappak na disiŋ ade ɓa sa? Iya ɗiy adawyaŋ pak sən offo yi, ɗiy zit adawyanən ɗarə.

¹⁴ Vi dəlvafuŋ waknah də wəsən gagdak na Yawe, va iŋkile adaknəhnən pehe.

¹⁵ Əray aka məpsən mbazla sən meggeni! Kəslahãnək muwən nok vi dəgəɗgən gərəŋgərəŋgə, vi kawla zən mekeleŋ.

¹⁶ Dit wili yi kəbə day ki də gagdaka! Asə tam ɗa, kəppangən gaŋyã nok appaka: məɗawak na va dəzəŋ na Yawe watəkkpaŋ akok gəm ərba wil aka gagdak noko!

¹⁷ Vi daraw kəgəɗ a Liban əŋka, wakkpaŋ akokum, zəgeɗ memeyẽɗ kəbayaŋgəŋki waki sukum geslne akokum, as pak na aka wən na mbel net ɗiy məs kəziyaŋgəŋki, aka gagay nokum kəɗɗaŋ aka dəlva a walaŋgəla-metiŋ gəm aket ɗiy naddəvən pakəŋki.

¹⁸ Miy zəgakamaŋgəlva məzaɓ-zəga azaɓ adawtər di? Awaniɓa məhəsən dəhəs karba tepelke, hara ɗəf dəzaɓ dəppangən kiyən sən di? Wəza nan na zəgeɗmeŋgilveɗ mə gbimmeɗeŋgə.

¹⁹ «Əray aka ɗəf mənah sən wələŋga na: Asili, gəm sən gərəm virŋgbi'e na afɗahə, zəga tay adarba ɓa. Də məkkəɗ sit meleŋge də təbəz babar zlaŋ, əmpəs siɗikke tay addəvit dayday ɓa!

²⁰ Ya Yawe tay addəv gəla nan salala! Ɗiy naka dəlvafuŋ pak dəɓətaŋ sləɓək abani.»