Habakuk 1 - Bible en Guidar

Wəhəm na Habakuk də wəzlan na Yawe ( 1:1—2:5 )

¹ Wən nawtaw an məskəleŋ Habakuk awələ.

Məskəleŋ tay iya Maŋgəlva nawtəra

² Hã pay gbəŋgbar kandi Yawe? Nəŋgəzlək vaŋvəl kawrəh əbbaha, kəprəm su ɓa, nəŋgəzlək vaŋvəl azok sən gagay, kəkõhgu ɓa.

³ Vimi kədarban su zəga mbərayən də əzəmsahã nam di? Wəray də gagay yi abawa; ərmama də wəŋgrãh dədaɗɗa.

⁴ Vini məɓe' səni mahenziŋ ɓa, əssa təstəs arba əmpa ɓa. An məs mambray tay əker gabba ɗəf təstəsə, daski wətawwən adawslokoro.

Əzlan na Maŋgəlva, mə Babilon tay əgulun təkiya

⁵ Məzi horokum aket ɗiy naka dəlva, mule də wəggəta, məggətə! Vi wəza wagəɗ aka pay nokum, an mənah sukumi wən nan na kətafnən na ɓa.

⁶ Vi in yakəŋ əki mə Kaldiyeɗi, ɗiy tatrãhɗe awlaŋ sasãh ɗəf ɓa, məzəbbalanən ki dələv gboŋgu, vi kawmõh təki nassa məza neti ɓa.

⁷ Korsomoyɗeŋ nawgeslne' sitiŋ, ndəɗaŋgə dədawɗinən gagdak net də tive nan sən kiyti.

⁸ Pilseŋge nan kakara azet daykiyit de'enɗe də ənza, folfoləŋ daykiyit kirɗemuyã də moskoyo, məpeŋgeŋ pilseŋge nan tahəŋ əzlahaŋgə, məpeŋgeŋ pilseŋge nan sə faraɗa adozzoŋ dəveŋ va gazla dawgəm zən aka slu nani.

⁹ Pakgit tay əzzoŋ də gagay, heret sek abe, əkkeletin məfərsəneɗ va hoyoŋko.

¹⁰ Ndəɗaŋgə məzumasaŋ aket milyeŋge, deyeɗe akkpaŋgaŋgək zəga nasmay neti. Korgu pak zəga nawmas net akani yi: kawmõhən na, ndəɗaŋ əkot dəlva.

¹¹ Vasna səmyã tay əɓla, tay əmbata. Araygənək kini; gbogboŋ nan dəkkpaŋ ka maŋgəlva nani!

Məskəleŋ tay əya Maŋgəlva əmpa

¹² Gala də ətəŋga, istə Yawe nawa, Maŋgəlva naw gəm Salala naw ɓa sa? Məmtə na ɓa! Yawe, kəɗi na kawtaw wəni; kəɗi milɓe na, sən kazga'i.

¹³ Horok nzoŋzoŋgi nawla mbərayən, kəɓap na kawla əsərma ɓa; ya vimi kədawle məzəmaŋ kiya di? Wakəsok ɓatɓat an məsdaraw tay əsɗək ɗəf an təstəs day kiyən sa?

¹⁴ Kəɗɗak ɗəf va kilfeŋge na pehe, va vẽvẽɗe məza daya net ɓa:

¹⁵ ɗəfəs tay ərmet də teklem pakə, tay əziyit addəv zəva gəm addəv sosor nani, vini adanneken zəni, adaɗɗəla.

¹⁶ Vasna, ndən əzi mbel sən zəva nani, əzla tursan sən sosor nani, viyiti yi arah haran nan diyɗa, zəga nawzəm nan kakat kakatə.

¹⁷ Vasna, wazzuk zəga səddəv zəva nani, kazban əbey ɗiy naka dələv ɗayɗay məza awəl na sasãh ɓa sa?