Gəlyaɗe 94 - Bible en Guidar

Maŋgəlva məmpəlkiya yi

¹ Yawe, Maŋgəlva məmpəlkiya! Arban zuko Maŋgəlva məmpəlkiya!

² Asili, is mətawwən naka dəlvafuŋ, afaɗ sit haran net məsfərkeɗi.

³ Hã gap pay dewe məsdarawɗeŋ adassoŋ di Yawe? Hã gap dewe məsdarawɗeŋ adazban əkaɓaŋ di?

⁴ Məɗɗaŋ mbəraynəs pak tay iɗiyaŋ gegeŋgere, tay əpeleŋ nawkuwa, tay əɗinən kiziti.

⁵ Tay əŋkinnin ɗiy noko, Yawe! Tay əsərnən met en nawray noko;

⁶ tay əŋgrofnin: Ga gəbay də molhõyõ, tay əbeynin mitiwɗe.

⁷ Aɓɗaŋ na: «Zəga tay Yawe adawla ɓa; Maŋgəlva na Yakob aprəm gabba zəga ɓa!»

⁸ Məsəna, məmsan kiyit naret ɗiyi; dərweŋge, dewe kədawrəhaŋ əsən di?

⁹ Məs dətipsən slema ɗəf na, aprəm na ɓa sa? Awaniɓa an dəɗɗa hara ɗəf na, awəl na ɓa sa?

¹⁰ Ndən məs dəzga' sit ɗiy ɗaɗarɗe na, ada na met ɓa sa? Ndəni məs dəpsən əsən sən ɗəfa,

¹¹ Yawe asənək əɗɗum na ɗəfa səmyãy ɗarə.

¹² Ɗəɗah na ɗəf an kəsəɓ səni Yawe, məs kəyagan sən mahenziŋ noko,

¹³ kapsən əffet addəv pay na tatwãha, hã an məso'ni vov sit məsdarawɗe.

¹⁴ Vi Yawe appet na ɗiy nan ndol ɓa, azgan na an nawray van ɓa:

¹⁵ vi təstəs wamil akki ətawwən əmpa, məs mekret bar pak waddoŋ ammbani.

¹⁶ Naway nawtəru səvet məɗɗaŋ mbərayniŋ di? Naway məziwwe naw abet məɗɗaŋ mambrayiŋ di?

¹⁷ Va Yawe dəbbah su ɓa, siɗikke ɓa na, kəta wasan aret ɗiy mimtiti.

¹⁸ An nənahək na: «Nəɓap na iziw ɓa!», Moggon nok tay ərma vawa, Yawe.

¹⁹ Pay əɗɗumɗe aslakataŋ akawa, əsɓaw kədasɓawəŋ, neki yi aka gəɓa zuwa.

²⁰ Mi dəsopok də əsap net ɗiy mbəreytiŋ, məkiyaŋ tatwãh də əzelen əsərək di?

²¹ Tay əkkalaŋ aka ɗəf an təstəsə, ɗəf an dəsən akan ɓa, ənəhaŋ na araygənka.

²² Yawe akkpaŋgək təki nawɗam nawa; Maŋgəlva naw milɓe nawɗam nawi.

²³ Wakkpaŋgan heslepe net aketi; wazet də daraw net tusso; Yawe Maŋgəlva nam wazeti.