Gəlyaɗe 91 - Bible en Guidar

Təki nawɗam aza Maŋgəlva yi

¹ Ɗəf dəsan a təki an Məsəɗəɗə aɗamə, wavoŋ ara zeŋgile na Maŋgəlva Məzuɓappak.

² Wanənah aka Yawe na: «Təki nawɗam nawi, korgu nawi, Maŋgəlva nawi: akan nəɗi əɗɗum nawa!»

³ Ndəni dədawkõhguk səka bizwil na məffəka, gəm səka gəbaymərma.

⁴ Də deɗeken adawzaɓ təki nawɗam noko, wakəɗam ammba perslekeni. Gegesiŋ nan baray yi gəm lukut-na-təbzi.

⁵ Kəgeslne' na sən an məgeslnegən ɗəf dəfəɗ ɓa, may sən har məhon kapay ɓa,

⁶ may sən gəbaymərma məbbal ara guzli ɓa, may sən gəbay metiŋ məbay ɗiy də tataŋ pay ɓa.

⁷ Kəta ɗiy gabal dəmtaŋ amaŋgavoko, ɗiy məza aŋɗaŋ ɓa dəmtaŋ aka va dəzəŋ noko, nok arəŋguk na ɓa.

⁸ Kəzigən horok kaka' wakula va adawfaɗ sit məsdarawɗe.

⁹ Vi istə Yawe, təki nawɗam nawa! Adan kəɗiyək Məsəɗəɗə ka təki nassa noko,

¹⁰ əray ade na akok ɓa, gəbay adder na aza gizlirke nok ɓa,

¹¹ vi waɗi wən nan sit maslayɗe nan dəgukungən aket tiveɗ nok pakə.

¹² Waslokun aka veti, vi tuluk adawtaŋgbãy sən gərəm ɓa;

¹³ wakədaw aka ɓoolu gəm aka barway, wakəndapan wətən ɓoolu də dohõtuya na pehe.

¹⁴ Adan azaw asapə, wanəpəla, wanəɗi kiyən foŋgo, adan asənək iya nawa.

¹⁵ Wayuwa, wanəzlan səni, wanəsaw dəndən addəv tatwãhã; wanəbite, wanəgagdakani;

¹⁶ wanəban də əzva, wanərban sən wəkõh nawa.