Gəlyaɗe 90 - Bible en Guidar

Gəlyeɗe en mapoɗeti ( GLƊ 90—106 ) Ɗəf watoŋgu, Maŋgəlva wasani

1 Wəkkam na Moyis, ɗəf na Maŋgəlva.

¹ Wəkkam na Moyis, ɗəf na Maŋgəlva. Daya, va sayit ɗiy asani kəsokuk təki nassa namə.

² Tak mossorgoɗe gugriɗ dərbaŋ ɓa, tak əsɗu dəlvafuŋ də enziya egge, far na sete, hã faɗə, istə Maŋgəlva.

³ Is əmndagan ɗəf aka burɗuku, yaŋ kəmna: «Məmndoŋgu kirtin Adam!»

⁴ Vi əzva gabal ama horok na, va nadəfɗaŋga yi, əsɓəta an dətoŋgu, va ənziya siɗikke na dəfɗi.

⁵ Is tat əduduɗukon ənziya na ɗəf, tay ətoŋ va əleŋ siɗikke, tay va kevile məzugilyeni;

⁶ waffuĩ dəmpummo, wasəɓə, də moskoy waɓətə, waŋkələ.

⁷ Vi ədagədəv nok agrakməka, herɗe nok azlahgənənək makramə.

⁸ Kəziyik heslepeɗe nam aboko, an məɗaman aboki ta'ə.

⁹ Vi ənziya nam tay əgrak sit herɗe noko; əzvaɗe nam əgrakaŋ va əmpəsa:

¹⁰ Əzva nam wagəɗ kaklaw buhul, adayək sawɓa na, əzva kaklaw dodopoɗo, ya fərka nan pak ɗari də wəzəmsahã; də kakara adawtoŋgo, mənam kəkəɗə.

¹¹ Naway dəsən gagdak nawdagədəv nok di? Məzugeslne' suk na, asənək herɗe noko!

¹² Ya ayagam əŋɗan pay namə, vasna wamərah maɗɗula a makramə.

¹³ Amili Yawe! Hã dewe di? Awla sasahĩt gewlet noko.

¹⁴ Abam də moggon nok pummo, waməɗɗəl sən ənneke, wamənneken zəm pay nam pakə.

¹⁵ Anneken səm zəm gba uvoŋ kənda maməŋka anneken səm zəm gba əzvaɗe məzəm sahãŋka.

¹⁶ Kəta gewleɗ nok dulanən wəza noko, kirtit tam dulanəngən gagdak noko!

¹⁷ Wəŋgla na Yawe Maŋgəlva nam dəsan akamə! Asɓan səm wəza na vamə, ha'aw, asɓan səm wəza na vam vani.