Gəlyaɗe 9 - Bible en Guidar

Yawe, məkõhgit məssehẽŋɗe dit məsər meti

¹ Səza daya net məyaŋgəlya; ndarara. Gəlyanalva na Davit.

² Wanəɗi ki Yawe də makraw taka, wanəpel sekeneɗ nok pakə.

³ Wanənneken zuwa, wanəɗi kiyko gəm əlvok də gəlya, Maŋgəlva Məsəɗəɗə.

⁴ An məzuzelɗe naw apilmiseŋgik dirɓe, wataŋgbãyaŋgə, gəm wazaŋ aboko,

⁵ vi kəkək wən ammbawa, kəplawəka; kəsokuk aka mazaŋga na məlĩ nok ətawwən təstəsə.

⁶ Kəheyẽtik ɗiy-ɗarə, kəzanək məs mambraya, kəvvuyonək iya nan faɗ hã sləɗə.

⁷ Məzuwzelɗe agrakaŋka, kiməskiyəŋ hã faɗə; kəɓzliwik walaŋgəleɗe gugriɗe, kaɗɗumeti kpẽh ɓa.

⁸ Yawe asanək aka mazaŋga nan hã faɗə, asɓanək mazaŋga nawtaw wəna.

⁹ Ya nan tay ətawwən aka dələv də təstəs nani, tay ətawwən aket ɗiy də tiveni.

¹⁰ Yawe dəsan təki nawɗam na məsərmani, təki nawɗam pay nawzəm sahã!

¹¹ En dəsənnən iya nok na, dəppanən əɗɗum net akoko, vi kazget məzukoyokun firik ɓa Yawe!

¹² Məyə gəlyanalva sən Yawe məs dəsan a Siyon, mərban an agəɗ pak aweleŋgit ɗiyi!

¹³ Ndəni dəmpəl kiyit ɗiyen məbeyti, tay əɗɗumoni, azgət ki əhəm net məzəmaŋ sahã ɓa.

¹⁴ Awlu sãhə, Yawe! Awla əzəmsahã nawa, vi məzuzelewəni, istə kədawmohũ səma əmta,

¹⁵ vi nəŋɗangən wəɗi kiyuk a maddambeɗe na Siyon, nənnekengən zu vi wəkõh noko.

¹⁶ Ɗiy na guw agəkaŋgək addəv vov aso'oŋgu, tilit arəmək aka bizwil məs aɗamanəni.

¹⁷ Yawe arbanək zən, atawək wəna, məsdaraw dərəmgən aka bizwil an azaɓ də vani. Əziwe

¹⁸ A təki net mimtit məsdarawɗe adamndoŋgu dit ɗiy-ɗar məzgətaŋ ki Maŋgəlveŋ pakə.

¹⁹ Hara na, kazgəti kiyit məssehẽŋɗe faɗ ɓa, may əga net məzurayɗe azə na ɗah ɓa.

²⁰ Asili Yawe! Ɗəf titir adaska wəla ɓa! Ətawwən aket ɗiy-ɗar dəsan aboko!

²¹ Aggbo' geslne aketi Yawe, vi ɗiy-ɗar dəsənəngən na, namtaŋgə. Əziwe