Gəlyaɗe 89 - Bible en Guidar

Aŋga wən miynə sən Davit asan di

¹ Əpel-məmyã'ən na Etan zev Ezrah.

² Wanəgagdakok pay pak vi ulasahã noko Yawe. Va sayit ɗiy amə' pak maw warban moggon noko.

³ Vi nənahək na: «Moggon nok ampak suwerin faɗə; kəziwginik əssa ɓəlɓəl nok a disiŋ.»

⁴ Niziwginik wənmiyna aka məwele nawa, nəsway sənək gawla naw Davit na:

⁵ «Wanəɗi zeŋvuk aka məlĩ hã faɗə, mazaŋga na məlĩ nok wasan va sayit ɗiy amə' pakə.» Əziwe

⁶ Disiŋ dəɗi kiyit sekeneɗ noko, Yawe! Əkkal net ɗiy salala dəɗi ki moggon noko.

⁷ Naway a disiŋ nawslan də Yawe di? Naway dəgil səɗek səret meŋgilveɗ va Yawe di?

⁸ Maŋgəlva nawgeslne' sən diyɗa yi addəv əkkal net maslayɗe, ndəni nawgeslne sən daykiyit en dətərwəslnəni.

⁹ Yawe Maŋgəlva Məzuɓappak! Naway gbogboŋ va is di, Yawe? Moggon noki dəkar kiyko.

¹⁰ Istə kədawndama fərka na pehe; pay vovolumɗe nan asilyoŋgu, istə kədawɓətgiti.

¹¹ Istə kəŋkən Eziptə, də gbogboŋ na vok kəndolet məzuzelɗe noko.

¹² Disiŋ noki, dəlvafuŋ nokiye'e! Ənziya naka dələv də aryeɗ nani, istə kəzəmiɗe.

¹³ Tapaslay pay də disiŋ də dohoŋ pak is kəzəmiɗe; may mossorgo metiŋ na Tabor də an na Hermon taɗɗəlaŋ aka iya noko.

¹⁴ Vok gboŋgboŋgi, vok ɓəli yi, dəzəŋ nok tay təlla!

¹⁵ Təstəs də gegesiŋ suwer mazaŋga na məlĩ nokəŋgə; moggon də gesiŋ tahəŋ ədawaŋ aboko.

¹⁶ Ɗaɗah net ɗiy dəsənnən əɗi kiyko! Wadawaŋ addəv əkeɗeɗe noko, Yawe!

¹⁷ Waskəlaŋ də zit ənnek pay pak aka iya noko, aka təstəs noki adawziweŋgi.

¹⁸ Vi istə kiwən na gbogboŋ neti; də mbəlembəle noki yi mədawsilgən mohõmə.

¹⁹ Vi Yawe yi baray namə, salala na Israyeli məlĩ namə.

²⁰ Ya kəpel sitik en dətafkun addəv ula kəmna: «Nəpsənək əbbah naw sən məs makrani, nəɓaygənək məwele daykiyit ɗiy nawa.

²¹ Nərəhək Davit gawla nawa, də mẽl salala naw nəpesle.

²² Vaw wasan ɓəlɓəl azani, vaw wasɓani.

²³ Məzuzel arəh na slamma ɓa, məsdaraw aɓap na əska wəlan ɓa,

²⁴ vi wanəŋkin məzuseɓɗe nan səbani, wanəbey məzuzelenəni.

²⁵ Moggon naw də ulasahã naw wassoŋ azani, wasilgən mohõn də iya nawa.

²⁶ Wanəpsən pehe ammba vani, məlpeŋɗe ammba van dəzəŋ.

²⁷ Nan wayu na: “Əbba! Istə Maŋgəlva nawa! Milɓe nawkõh nawa!”

²⁸ Naw wanəɗi ka tizi, daykiyit milyeŋge naka dəlvafuŋ.

²⁹ Wanərma moggon naw hã faɗə; sessel wənmiyna naw wasan səni.

³⁰ Wanəzban əɗi zeŋvin aka məlĩ hã faɗə, mazaŋga na məlĩ nan va disiŋ adanziya.

³¹ An kirtin appanənək mahenziŋ nawa, tay ədawaŋ aka əsərək naw ɓa,

³² an tay əzlahaŋ kiyit wəsəɓɗe nawa, an tay əzbetin tiveɗnanziya naw ɓa,

³³ wanəzga' sən əɓoŋ net də zleŋge, gəm heslepe net də wərga,

³⁴ ya nəzargən na moggon naw səkan ɓa, may maw kpaŋgən səka an niynə ɓa.

³⁵ Nəggarna ki wənmiyna naw ɓa, nəddəɗan na an dəgil səmaw ɓa.

³⁶ Ka faɗi yi, nəsway sən aka salala nawa: owwo! Nuwə na wən sən Davit ɓa!

³⁷ Zeŋvin dədawsan aka məlĩ hã faɗə; mazaŋga na məlĩ nan wasan abaw va paya,

³⁸ va təla, waziw ɓəlɓəl pay pakə, ka məziwe gesiŋ ara slaybuwna.» Əziwe

³⁹ Ya istə kəzgani, kəzelen mesiya noko, gəduvuk adək akani.

⁴⁰ Kəndapanək wənmiyna na balam noko, kəraygənək kulpupu na məlĩ nan afuŋ.

⁴¹ Kətiliketik mambareɗ nan pakə, kəɓzluwək korguɗe nani;

⁴² Məzutoŋgoŋ pak amohõnənka; akkpaŋgək ka zəga na əra net meggeŋgiɗni.

⁴³ Kəpsənək gbogboŋ sən va məzuseɓe, kənnekenik zit məzuzelɗe nan pakə;

⁴⁴ kəkkpaŋganək masalam nan akani, kəsək sən pay nalpa ɓa.

⁴⁵ Kəbayək ma gagdak nani, kəɓzluwək mazaŋga na məlĩ nani.

⁴⁶ Kəduduɗukonək uvoŋ net gewleɗ nani, kəggbo'ək wil akani. Əziwe

⁴⁷ Hã ka dewe kədappan əɗam pay pak di Yawe? Mokrok adappan əzluk va offo di?

⁴⁸ Aɗɗum aka ənziya na zeŋgilewa! Kəzəməɗ ɗəf na va zəga ɗari!

⁴⁹ Ɗəf naŋgay dədawsan məza əmta ɓa, dədawkõhgən kiyən səma təki net ɗiy mimtit di? Əziwe

⁵⁰ Aŋgay əɗɗa moggon lahəŋkəŋ di Yawe? Kəsway sənək Davit aka gesiŋ nok ɓa sa?

⁵¹ Yawe! Aɗɗum aka əra adawretin gewleɗ noko, aɗɗum aket ɗiy nammba vawiŋ pakə.

⁵² Məzuzelɗe nok aranənka Yawe! Tay əranən mesiya nok də təki al pakə.

⁵³ Soko sən Yawe hã faɗə! Dəsan vaska, Dəsan vaska!