Gəlyaɗe 88 - Bible en Guidar

Ama əmta nan teɓɓe

¹ Gəlya, gəlyanalva net kirtin Kore. Səza daya net məyaŋgəlya, də pozloro nawslan wəla gəlyanalva. Əpel-məmyã'ən na Heman zev Ezrah.

² Yawe Maŋgəlva nawkõh nawa! Kapaya, in əhəm suko, dəfɗa in əzzaw aboko.

³ Kəta əkkam naw dəgapko; apak sləmok ammba əhəm nawa.

⁴ Vi gəɓa zu abək dit tatwãhɗe, təlu tay zleɓɓe ama əmta.

⁵ Aret ɗiy mimtit adaŋɗawəni; in yakəŋ va ɗəf məs tay a man ɓa,

⁶ aret mimtit firikke, va kigəbayit ɗiy məvoŋgit addəv magamasə, en məs kəzgət kiyti, vi awɗakaŋgək faraɗa də isi.

⁷ Kəvoŋguwək addəv kpukpum na vovu, addəv guzliyo, addəvit givoŋɗe.

⁸ Herɗe nok aggbo'oŋguk akawa; dit vovolumɗe nok kəyawa. Əziwe

⁹ Kərɓehetik bayneŋgiɗu səzawa; kəɗiwək ka zəga nawzel ama hereti. Məmsani mawa, nəɓap na əgilye ɓa.

¹⁰ Haraw pimpim sən əhəma. In tat iyuk pay pakə Yawe! In tat ətəl vaw suko.

¹¹ Sit ɗiy mimtit kədaɗɗa sekeneɗ sa? Ɗiy mimtit wasilyoŋ kawɗiynən kiyuk sa? Əziwe

¹² Kawpeli wən na moggon nok addəv magamas may wən na təstəs nok a weleŋgit ɗiy mimtit sa?

¹³ Kawsənni sekene nok addəv guzliyo, gəm təstəs nok aka dələv nazgət sa?

¹⁴ Ya naw suk nədawhəm suko Yawe! Də pummo ləŋ, əkkam naw adawgap aboko.

¹⁵ Vimi kədazgaw is horok haɗamgən su di Yawe?

¹⁶ Təŋ səka sawã nawa, in tat va məmtuwa, geslne nok armuwəka, mbagu gərəŋgə.

¹⁷ Herɗe nok azzoŋguk akawa, ədagədəv nok amsanək mawa.

¹⁸ Tay əkaraŋ kiyu va iŋkile pay pakə, atakawənək dahãdahã.

¹⁹ Kərɓehetik geleŋgiɗu dit beyneŋgiɗwa; guzli yi dəsan ka baynaw na makrawa.