Gəlyaɗe 85 - Bible en Guidar

Yawe arban səm moggon noko

¹ Səza daya net məyaŋgəlya net kirtin Kore, gəlyanalva.

² Kərbanək wəŋgla nok vi dələv noko, Yawe! Kəmndegetik ɗiy na Yakob səka balamə;

³ kəndəkək heslepe net ɗiy noko, kəvvuyonək mambray net pakə. Əziwe

⁴ Kəbayək met herɗe noko, kəppanək ədagədəv noko.

⁵ Amndagamə, Maŋgəlva məkõhgəmə! Appan mbərayən məgəɗ suko.

⁶ Ka faɗi kədassok gədəvuk mədan akam sa? Wakəzban əke herɗe nok akam hã dugurmuk sa?

⁷ Namna istə kədamndok əmbəlgəmə, ɗiy nok dənnekeŋgin də is ɓa sa?

⁸ Arban səm moggon noko Yawe, apsəm əkõh noko.

⁹ In tat əprəm mi Maŋgəlva Yawe adawpel di, vi tay əpel wən na: «Zazay» sit ɗiy nani gəm sit en dətafnəni, ya adamndoŋ addəv dərwa ɓa!

¹⁰ Ha'aw wəkõh nan go'oy azet məzugeslne'eŋ sənəni, vi gagdak dəsangən aka dələv namə.

¹¹ Moggon də Gesiŋ almaŋka, zazay də təstəs aklakənək vet awla ziti.

¹² Gesiŋ səka dəlvafuŋ adawgilyeni, Təstəs tam sə disiŋ adaprikeni.

¹³ Yawe tam napsəm əzaɓa, dələv nam wapsəm zəga na mabardaw nani.

¹⁴ Təstəs aban adawdawa, tələn tay əntar tive.