Gəlyaɗe 84 - Bible en Guidar

Gəlya net ɗiy məmbataŋ a Yerusalem

¹ Səza daya net məyaŋgəlya; məyan də gəzləŋtəndəŋ na mə Gat. Kirtin Kore, gəlyanalva.

² Məŋgluwək təki nassa nok sawɓa, Yawe Məzuɓappakə!

³ In tat haɓakhaɓak va nəmtə ammba ətoŋ a daŋgla na Yawe. Gəɓa zu pak tay ənnek sən Maŋgəlva madarani.

⁴ Siyom dayday tay ərəh gəla, papatawək tat əzaɓ gəla nat nawzi kirtit go'o də gəlamatuya noko, Yawe Məzuɓappakə, məlĩ nawa, Maŋgəlva nawa.

⁵ Əzaɓ aket ɗiy nanokda: waɗiynən kiyko! Əziwe

⁶ Ɗəɗah na ɗəf dərah gbogboŋ səzoko: warma tive də makran paparə;

⁷ Məzutoŋgoŋ də walaŋ na Baka (nawhəma), ndəɗaŋ əkkpaŋgan ka heret iŋkile, buwən na məndəvən əggbo' wəzaɓ akani.

⁸ Waddoŋ abe abe də gbogboŋ neti, warbanən zit aba Maŋgəlva a Siyon.

⁹ Yawe Maŋgəlva Məzuɓappak, aprəm əkkam nawa; apak sləmoko, Maŋgəlva na Yakob. Əziwe

¹⁰ Aw Maŋgəlva, awla baray namə, awla hara mesiya noko.

¹¹ Vi əvoŋ taka adaŋgla anokda, adayək ki əvoŋ gabal a təki mbərni, An nəwel na: əssa aka ma tive na gəla na Maŋgəlva nawi, day ki əssa a gizlirkeɗe net məs mambrayɗe.

¹² Vi Yawe Maŋgəlva, pay yi, baray yi; Yawe tay əpsəm mbəlembəle də gagdaka, awzle məzudawaŋ aka təstəs-gərak də moggon ɓa.

¹³ Yawe Məzuɓappak, ɗaɗah sən ɗəf an dəɗi əɗɗum nan akoko.