Gəlyaɗe 83 - Bible en Guidar

Maŋgəlva kəsok vok slakatta ɓa

¹ Gəlya, gəlyanalva na Asafə.

² Aw Maŋgəlva, kəffet ɓa; kəsok semsem ɓa; Maŋgəlva kəsok vok slakatta ɓa.

³ Məzuzelɗe nok yeŋ əhãyãŋgə, məzuseɓɗe nok tahəŋ əsilgənən kiyti.

⁴ Tahəŋ əheweŋ wən aket ɗiy noko, tahəŋ əɗɗumoŋ mbərayən aket ɗiy en kədawga.

⁵ Aɓɗaŋ na: «Mədamə! Məzan səm dələv neti, sləma Israyel adawya əmpa ɓa!»

⁶ Aslerninik met taka, kaynan wən akoko:

⁷ Ɗiy na Edom dit mə Ismayelɗe, en na Mo'ab dit kirtət Hagar,

⁸ Gebal, Ammon, Amalek, Filisti dit ɗiy na Tir.

⁹ Asiri dayday asapək dənɗaŋgə, asanək məzəbbah net kirtin Lot. Əziwe

¹⁰ Agəɗ sit va sən Madiyan, sən Sisera, gəm Yabin a lolohõ na Kison.

¹¹ Məzeti a məlpa na En-Dor, akkpaŋgaŋgək ba'ar aka dəlvafuŋ.

¹² Agəɗ sit ɗiy gugriɗ net va sən Oreb də Ze'eb sit milyeŋge net pak va sən Zeba də Salmunna,

¹³ ndəɗaŋ mənahaŋ na: «Məmõh səm təki na Maŋgəlva!»

¹⁴ Maŋgəlva nawa, akkpeŋget va vẽŋvil, va tərɗa ammba səmyã.

¹⁵ Va offo adawzəm muyã, va hərzlum offo adawpalkat kiyit mossorgoɗe gugriɗe,

¹⁶ arɓehet də barkataŋ noko, azlahgən mekret də vẽŋvil noko.

¹⁷ Akip sit wil areti, dəkayanəngən iya noko Yawe!

¹⁸ Wil dədenni, mekret dəzlahgən hã faɗə, dərbaŋgən wili, dəzaŋgə.

¹⁹ Dəsənəngən na, nok iya nok Yawe yi, istə kaka' Məsəɗəɗə aka dəlvafuŋ gboŋgu.