Gəlyaɗe 78 - Bible en Guidar

Wən na Israyel an dətoŋ na, zəga nazgət kini ɓa

1 Əpel-məmyã'ən na Asaf.

¹ Əpel-məmyã'ən na Asaf. Ɗiy nawa, məpak sləmokum ammba mahenziŋ nawa, məkol sləmokum ammba əpel na mawa.

² Wanəkol maw də wənməkkpaŋga, wanəpel asənasəna an lahəŋka.

³ An məprəm də an məsənə, an efiŋgiɗim apeleŋ səmən akani,

⁴ məɗaman na sit kirtim ɓa, sən sayit ɗiy an dədazzani, waməpel wən na əɗi ki Yawe, əɓap nani gəm sekeneɗ en agəɗə.

⁵ Aziwginək tive nazba sən Yakob, aziwgənək mahenziŋ a Israyel adaka. Aɗiyək wən nan sit efiŋgiɗim dərban sitingin kirtiti,

⁶ vi sayit en dədazzan dəyaganəngəni, kirtit en adawwaŋgə dəsilyoŋgən, ərban sit kirtiti;

⁷ dəppanəngən zit sən Maŋgəlva, adazgətaŋ kiyit wəzeɗe gugriɗ na Maŋgəlva ɓa, gəm dərmeningin wəsəɓɗe nani,

⁸ adassoŋ va efiŋgiɗit ɓa, sayit ɗiy məɓoŋti gəm mətemti, sayit məs mekret awziw ɓa, məsmaɗɗulet tay aka Maŋgəlva ɓa.

⁹ Zev Efrayim, tahəŋ dit gulomɗe nawhõn hara, anzoŋguk pay nalpa,

¹⁰ dərmanən wənmiyna na Maŋgəlva ɓa, dəŋgəmaŋ əzban mahenziŋ nan ɓa.

¹¹ Azgətaŋgək kiyit wəzeɗe gugriɗ nani, gəm sekeneɗ en arbə siti:

¹² Agəɗək zəgeɗ naggət aket abet efiŋgiɗiti, aka dələv na Eziptə, aka va na Sowan.

¹³ Antarək pehe vi kaggargiti, ziwgit iŋkile ɓələ.

¹⁴ Adawgitik ammba slaybuwən də kapaya, də dəfəɗa ara əkekeɓe' na offo.

¹⁵ Anterik milɓeɗ a kapta-muyã, apsitik iŋkile dəsaŋgən va səddəv vov net iŋkile metiŋgiti.

¹⁶ Səka gərəm məgilya, agilgit məŋkparɗe, iŋkile ədawaŋ va məlpeŋge.

¹⁷ Də as pak azbanənək əgəɗ sən mbərayən, atemeŋgik aka Məsəɗəɗə a təki mukuro.

¹⁸ Aslanən Maŋgəlva wawa'ə, də əssõh əzəm va mawəlet aŋgələ.

¹⁹ Yaŋ apeleŋ aka Maŋgəlva, aɓɗaŋ na: «Maŋgəlva waɓap ədəsəm way a kapta-muyã kpak sa?

²⁰ Ha'aw, argak milɓe, agilgitik iŋkile dit lolohẽɗ adawaŋka, ya waɓap əpsəm waya'e, slu de'de' sit ɗiy nan sa?»

²¹ Yaŋ Yawe aprəma, makran apilmisi: adəgədəv vakvak aka Yakob, adəgədəv aka Israyel.

²² Vi dəɗiynən əɗɗum net aka Maŋgəlva ɓa, dətafnən na wakõhgiti ɓa.

²³ Aɗi wən sən slaybuwən a disiŋ, akolik maddambeɗe na disiŋ.

²⁴ Azi sitik manhu, nawzimgiti, apsitik way na disiŋ.

²⁵ Naway pak azəmək way net məs gbogboŋɗe; aslən sitik əzəm nawbeti.

²⁶ Aɓlanək səmyã nammba pay nampum a disiŋ; də gbogboŋ nan aki səmyã sə dohoŋ.

²⁷ Aprikginik slu aket va burɗuku, biŋgeɗ diyɗa va hoyoŋko na məlpa.

²⁸ A dibirgidik net adawndolti, sulək ki təki nassa neti.

²⁹ Azəmaŋka abaŋgək sawɓa, aka may net aki siti.

³⁰ Vəreŋ net dəgrak ɓa, əzəm net tay a baret pas tagay,

³¹ yaŋ ədagədəv na Maŋgəlva ade aketi, abey ɗiy tektek nareti, abey gewleɗ na Israyel.

³² Də vas pak aɗɗaŋgək mambray əmpa, dəɗiynən əɗɗum net aket sekeneɗ nan ɓa.

³³ Tay ərreh pay net kpak fit va səmyã gəm əzva net addəv geslne.

³⁴ Səza adawbeyti, ndəɗaŋ əkayanəni; ndəɗaŋ əmilyoŋ əkayan Maŋgəlva,

³⁵ əɗɗumonən na, Maŋgəlva yi milɓe neti, Maŋgəlva Məsəɗəɗə yi məzubitti.

³⁶ Ya meti dədawrakani, hərzlumit tay əwə sən wəna;

³⁷ mekret dəziw akan lewlew ɓa, dəɗiynən maɗɗulet aka wənmiyna nan ɓa.

³⁸ Adan nan muwəl sasãhĩ yi, tay əvvuyon heslepe neti, awzet ɓa. Pay pak tay ərma makrani, awsilgin herɗe nan ɓa,

³⁹ Maŋgəlva asənən na ɗəf zəga ɗarə, səmyã məzumbat məza awmilyen ɓa yi.

⁴⁰ Təl ɓaɓay aɓoŋgoŋ akan a kapta-muyã, adansənənək gədəvən a təki mukuro!

⁴¹ Atəŋgənək əsla Maŋgəlva əmpa, adansənənək gədəv salala na Israyel.

⁴² Dəɗɗumonən an van agəɗ pay akõhgit səva məzuseɓ net ɓa.

⁴³ Aɗɗumetin zəgeɗ-narba nan a Eziptə ɓa, may teteleɗe nan aka muyã na Sowan ɓa.

⁴⁴ Akkpeŋgetik məlpeŋge net ka mbeli gəm məŋkparaɗe net vi adawsaŋ ɓa.

⁴⁵ Aslənik bembirɗe aketi, ahertini, eŋgeleŋɗe araygənənək dələv neti;

⁴⁶ Apsit zəga na mabardaw net sit heyɗeŋɗe, wəza an aɗɗaŋ sən zaray.

⁴⁷ Araygitik megezlembirkeɗ net dit ɓeɓrezleɗi, korvoŋɗe net dit ernene mərma ziti.

⁴⁸ Appetik zəgeɗ memeyẽɗ net sit ɓeɓrezleɗi, gebekɗe net sən əhãy na buna.

⁴⁹ Tay əki offo na ədagədəv nan aketi: herɗe, əfyõh na makrani, təɗək təɗəkə, aslin maslayɗe nawki əray aketi.

⁵⁰ Akolək tive sən ədagədəv nani, awget səza əmta əmpa ɓa, appanək gəɓa zit gəm zeŋgilet sən gəbaymərma.

⁵¹ Abeyik magaziɗe net mə Eziptiɗe, uwa maddaabəŋ na gawla net səddəv zev Kam.

⁵² Akek ɗiy nan va gilewi, əket a kapta-muyã va gazlaŋ net timeŋgiɗi;

⁵³ Akek zayə, mekret dəzlah ɓa, pehe asulup məzuzelɗe neti.

⁵⁴ Akek aka dələv nan salala, aka mossorgo metiŋ an van dəzəŋ amõhu.

⁵⁵ Arɓehetik ɗiy-ɗar səbeti, awɗak sitik hara dələv neti, aziyik mahəlfaɗe na Israyel addivit gizlirkeɗe neti.

⁵⁶ Mətemtiŋ, aslanənək Maŋgəlva Məsəɗəɗə, dərmenin wəsəɓɗe nan ɓa.

⁵⁷ Asmaɗaŋka, ambəɗanənək Maŋgəlva va net efiŋgiɗti, akkpaŋgək va bəle goslorro.

⁵⁸ Adansənənək gədəvən dit gəleɗe-nettuyeŋge neti; zəgakamaŋgəlva net asilgənək kotorok nani.

⁵⁹ Maŋgəlva aprəmka, makran assanək diyɗa, azganək Israyel firiki;

⁶⁰ Azarək sə təki nassa nan na Silo, gizlirke nan məs ampə aweleŋgit ɗiyi.

⁶¹ Appanək gbogboŋ nan gagdak nan ammba vet məzuzelɗe nani.

⁶² Appetik ɗiy nan aba masalam, adəkgədəv aket ɗiy nawray nani.

⁶³ Offo azimik gewleɗ nani, gəlya nalheɗ gorɗeŋge ammba zil tay əmpa ɓa.

⁶⁴ Məbəleti məsdəlveŋge nan ama əlpa, gil net gəbayɗe nan dəhəmaŋ ɓa.

⁶⁵ Va ɗəf məleŋgin, Yawe afɗahə, va ɗəf məs makran məs mbazla adanneken zəni.

⁶⁶ Abeyik məzuzelɗe nan səkəla dərɓegeti, arbəsitik wil faɗə.

⁶⁷ Azganək zev Yosef, dəwel mahəlfa na Efrayim ɓa.

⁶⁸ Awelik mahəlfa na Yuda, mossorgo metiŋ na Siyon məs aŋgələ.

⁶⁹ Arkak təki salala nan ləkləkə, aɗiyək faɗ va dəlvafuŋ.

⁷⁰ Awelik Davit gawla nani, agəm səmet gilewi.

⁷¹ Səmmbet gilew nan akiya; kataɗ Yakob, ɗiy nani, gəm mə Israyelɗe dəssoŋ ɗiy nawray vani.

⁷² Davit ateɗik də makran taka, akek də maɗɗula.