Gəlyaɗe 77 - Bible en Guidar

Addəv tatwãhã in tat əɗɗumet sekeneɗ nok en farə

¹ Səza daya net məyaŋgəlya, aka Yedutun; gəlyanalva na Asaf.

² Əhəm naw aza Maŋgəlva yi, sən nədawɓuh mawa, Əhəm naw aza Maŋgəlva yi; tay əpak sləman kəlazawa.

³ Pay na tatwãh nawa, Daya nədawkayani. Dəfəɗ na, vaw təlla awya ɓa, naŋgla əffeten su makraw ɓa.

⁴ In tat əɗɗumon Maŋgəlva, in əŋɗəsa; an in tat əɗɗum akani, maɗɗulaw əzlzlaɓa; Əziwe

⁵ kətekik sin dazzoŋ arawa, nəfãyka, nəsən an nawpel ɓa:

⁶ in əɗɗumon aka pay an lahəŋka, aket əzvaɗe na maguwa.

⁷ Dəfɗa, in əɗɗumon gəlya nawa, ndən əzzan aka maɗɗulawa, in əɗɗum akan gəm ənəh na:

⁸ «Daya wazgam faɗ sa? Azban na ula sasãhəm əmpa ɓa sa?

⁹ Appanək moggon nan hã faɗ sa? An apel aɓətək hã faɗ sa?

¹⁰ Maŋgəlva azgətək dəɗɗa moggon sa? Nawdagədəv aynan makran sa?» Əziwe

¹¹ Yaŋ nəmna, an dədawzəmgu sãhã na: «Va dəzəŋ na Məsəɗəɗə addəɗka!»

¹² Wanəɗɗumet wəzeɗe na Yawe; ha'aw, wanəɗɗumon wəza nok an lahəŋ naggət akani.

¹³ In tat əpelen an kəgəɗ pakə, in tat əmndaw aket wəzeɗe nok gugriɗe.

¹⁴ Maŋgəlva, tive nok salalay yi! Maŋgəlva mawani metiŋgin va Maŋgəlva di?

¹⁵ Istə Maŋgəlva məgəɗ sekene, gbogboŋ noki kərban a weleŋgit ɗiyi.

¹⁶ Də voki yi, kəkõhgit ɗiy noko, kirtin Yakob dit en na Yosef. Əziwe

¹⁷ Iŋkile awlukunko, Maŋgəlva, iŋkile awlukunko tahəŋ əkkereŋgi, vov sən kiyən tay əkkere.

¹⁸ Slaybuwən ametik iŋkile nani, maŋgalaw ahãyka, herɗe nok dayday tahəŋ telven-telveni.

¹⁹ Də wəhãy na buwən noko, əwiɗ akkeɓe'ik dəlva, dəlvafuŋ aɓəlka akkerke.

²⁰ Aka pehe yi tive noko, tive nok kəlaret iŋkile kpukpumɗe yi, batamuk awsən ɓa.

²¹ Kəkek ɗiy nok va gilew də va Moyis gəm Aron.