Gəlyaɗe 74 - Bible en Guidar

Əya Maŋgəlva aka əɓzla na gəla nani

1 Əpel-məmyã'ən na Asafə.

¹ Əpel-məmyã'ən na Asafə. Maŋgəlva vimi kəzgam faɗ ədagədəv nok hoɗhoɗ aka gazlaŋ kədawtaɗ di?

² Aɗɗum aket ɗiy nok məs kəlbah lahəŋka, mazlalwã an kəbit nawzəmgəla noko, gəm aka mossorgo metiŋ na Siyon məs kəsok də gəla akani.

³ Dok hã gap a təki dəɓəzl fədifədi ndaka: məzuzel araygənək zəga pak səddəv gəla noko.

⁴ Məzuseɓɗe nok anzlaŋgək vaŋvəl a təki nalma də isi; appaŋgək zəga-nawsinit azani.

⁵ Ulaŋ na va məslan zlimbe əbəl wəleŋɗe rəɓə.

⁶ Yaŋ akrepinik zəgeɗ məbay sit gawla naddəv gəla nok pak də zlimbe gəm ndəvəl.

⁷ Azannək gəla salala nok də offo, aɓəzlək afuŋ, yaŋ arnokonən gəla məs iya nok asan adaka.

⁸ Anahaŋ a mekret sap na: məmmus sim ŋgo'sa, kawzla təki nalma də Maŋgəlva səka dələv na Israyel pakə.

⁹ Mawla zəgeɗ-narban səmən ɓa, məskəleŋɗe tahəŋ əmpa ɓa, ɗəf tay səram dəsən hã ka dewey di ɓa!

¹⁰ Aw Maŋgəlva, gap hã dewe məzuseɓ nok adappan ərok di? Məzuzelɗe wazbanən əraygən iya nok hã faɗ sa?

¹¹ Vimi kəmndagan vok gəm vok dəzəŋ bas əbasən di?

¹² Maŋgəlva yi, məlĩ naw farə, ndəni afən əska wəla addəv dəlva,

¹³ Də gbogboŋ noki yi kənda ma pehe, kəkrep kiyit zəgeɗ darawit na pehe aket iŋkile.

¹⁴ Kəkrapək ki heŋzle, kipsən ŋgaɓa net wawayɗe ka nampəra.

¹⁵ Istə kəso' heret iŋkile dit lolohẽɗi, is kəkkpe' məlpeŋge məza akkpa'aŋ ɓa.

¹⁶ Kapay noki yi, dəfəɗ pak noki yi'e: istə kəɗi təla də pay a gəleti;

¹⁷ Kəɗiyik meŋge na dələv pakə; is kəɗɗa dabya də təlapaya!

¹⁸ Aɗɗumoni: məzuzel aranənək Yawe. Ɗiy dərweŋge tahəŋ əraygənən iya noko.

¹⁹ Kəpsən Israyel dəsan mukuɗuŋgulo nok sən zəga mokrokon ɓa, kədazgət kiyit məssehẽŋɗe nok hã faɗ ɓa.

²⁰ Awəl aza wənmiyna noko: təki tuŋgbummo nawɗam naka dələv pak aknahək dit məs gagayɗe.

²¹ Məs məsərman adarba wil ɓa, məssahã də məzuray dəɗiynən ki iya noko!

²² Asili, Maŋgəlva! Ahãy ammba zuko! Aɗɗumon an dərweŋge adawrokun pay pakəŋka.

²³ Kəzgət ki ɓaɓəlmet mərmaŋ mama azok ɓa, ki əɗi geŋgere net məzusilyoŋ akok pay pakəŋ ɓa.