Gəlyaɗe 73 - Bible en Guidar

Gəlyeɗe en mohokoti ( GLƊ 73—89 ) Vimi zəga adawdaw ammbet məsdarawɗe di

1 Gəlyanalva na Asafə.

¹ Gəlyanalva na Asafə. Maŋgəlva moggoni azet mə Israyelɗe, azet ɗiy en məs mekret bar pakə.

² Ya mbara siɗikke ɓa na təlu azlzlaɓka, siɗikke dəpəl ɓana maslarkatay agəmək təlwa,

³ vi kotorok net mulanən zit adaɗɗuwa, nədawla ərəh net məsdarawɗe əmbat abe abe.

⁴ Hã gap əmta neti, tahəŋ də tatwãh ɓa. Gəɓa zit ɗiklik ɗikliki.

⁵ Tahəŋ əzəmsahã va net ɗiy ɓa, awrahaŋ ərga va net ɗiy ɓa.

⁶ Ndəni adawkaɓaŋ sən fərka neti, darawi zəga nawgul azeti.

⁷ Mikirit, heret pəhpəhə, an adaɗɗumoŋ a makret adayək kiyit meŋge.

⁸ Tay əmasaŋ aket ɗiyi gəm əpeleŋ mbərayəni, də wəɗi kiyzit adawpeleŋgi.

⁹ Əkol met ərma mama aza Maŋgəlva, əzelet ɗiy aka dəlva.

¹⁰ Vini ɗiy adakkpaŋgaŋ dəzeti, gəm ətaf əpel net va iŋkile zazayɗe.

¹¹ Yaŋ aɓɗaŋ na: «Mbarmbar Maŋgəlva adawsənən di? Əsən tay aza Məsəɗəɗə sa?»

¹² Yeŋki, məsdarawɗe neki, tahəŋ pay pak fendeŋge, uwanən arya neti!

¹³ Gesiŋ, ɗari yi nərma makrawa, nəɗa vaw karban na nəgəɗ zəga ɓa.

¹⁴ In tat əzəmsãhã pay pakə, va təki addaŋ pak məzga' suwi.

¹⁵ An nənahək na: «wanəpel va neti», vasna ki sayit kirtuk nədawzəma.

¹⁶ Nəɗɗumonək wən nan kawsənni, as pak tuwãhi ama harawa,

¹⁷ hã gap in kulo' addəv gəla na Maŋgəlva, nəprəmək gabba an dədazzan aketi.

¹⁸ Gesiŋ aka maslarkatay kədawziti, vi kazlbet dəzaŋgəni.

¹⁹ Wazaŋ go'u, wagrakaŋgə, azaŋgək sən geslne.

²⁰ Va əssine adawza dərɓaga əfɗaha, Daya kəfɗahək na azgət kiyiti.

²¹ Gala makraw adampərawa, hã əssan zlem zuwa,

²² naw va dərwa nani, naprəm gabban ɓa, va zəga mamayã, də vas pak in tat də isi.

²³ Naw in tat də is pay pakə. Kərmak vaw dəzəŋgə,

²⁴ wakədawgu də wəzga' noko, wakəgəmu addəv gagdaka.

²⁵ Naway naw a disiŋ an istə ɓa di? Nənneken na zu aka dəlvafuŋ ɓa.

²⁶ Zu də makraw pak ayaŋka; Maŋgəlva yi milɓe na makrawa, gəm haran naw hã faɗə.

²⁷ Vi məzuzaraŋ səzok tahəŋ əzaŋgə; wakəzan ɗəf an dəppoko.

²⁸ Əssa go'o də Maŋgəlva na, arya yi azawa; təki nawɗam naw na aza Yawe Maŋgəlva, vi kawpel aket wəzeɗe nok pakə.