Gəlyaɗe 71 - Bible en Guidar

Kəzgaw aka əgal nawəŋ ɓa

¹ Yawe, azok nədawɗama; kəppaw ərba wil ɓa!

² Wakəpəlu də təstəs noko, wakəbitwa. Apak sləmok kəlazawa, akõhguwa.

³ Asok milɓe nawa, təki nawɗam naw pay pakə: Kəɗiyək wən nawkõhguwa. Vi milɓe nawkõh naw gəm gəla nawɗam naw kənani.

⁴ Maŋgəlva nawa, akõhgu səva məsdaraw, səva merəm mama gəm səva məs gagay.

⁵ Vi zəga nawga naw kənani Yawe Maŋgəlva, akok nəɗi əɗɗum naw far səka sãwãwã.

⁶ Akok nəges təŋ səddəvət əmma, təŋ səddəv dukzlum kuɗakaw dəndəta. Pay pak wanəɗi kiyko!

⁷ Nəkkpaŋgək va zəga naggət akan azet ɗiy diyɗa; ya istə təki nawɗam naw an gboŋgboŋgu.

⁸ Kəta baraw aknahək də əɗi kiyko, wanəgagdakok pay pakə.

⁹ Kəzgaw aka əgal nawəŋ ɓa; aka gbogboŋ naw agrakəŋ ɓa, kəzgaw firik ɓa.

¹⁰ Vi məzuzelɗe naw tahəŋ əpeleŋ wən nawa, məzutaŋgalwən aslereŋgik sapə.

¹¹ Də ənahaŋ na: «Maŋgəlva azganəka; mətakani mərma, vi ɗəf tay nawbitin ɓa.»

¹² Aw Maŋgəlva, kəzar səzaw faraɗa ɓa, Maŋgəlva nawa, ade abbah su də kakara!

¹³ Məzukayanən zeŋgilewa, wil dəssoŋ aketi, dəzaŋgə! Məkayanən əray naw pak ərba wil dəsan aketi, dəssoŋ simbim simbimi!

¹⁴ Naw in tat əgan pay pakə, wanəmpa təlu iya gəlya nawɗi kiyko.

¹⁵ Maw wapel wən na təstəs noko gəm wən nawkõh nok pay pakə, nəsən na əŋɗa nan ɓa.

¹⁶ Wanəde əgagdokok vi wəzeɗe gagdakɗe noko Yawe Maŋgəlva; təstəs nok nədawpel kaka'ə.

¹⁷ Maŋgəlva, kəyagawək təŋ səka gawlawa, hã kakaŋ in tat əpel wən nok naggət akani.

¹⁸ Də wəgal naw gəm magalagala nawa, kəzgaw firik ɓa, Maŋgəlva: vi nəpelgən an kəgəɗ də vok sən sayit ɗiyəŋka, gbogboŋ nok sən naway di pakə.

¹⁹ Təstəs nok tay hã a disiŋ Maŋgəlva! Is məs kəgəɗ zəgeɗ gugriɗe, naway va is di Maŋgəlva?

²⁰ Is məs kərbet səm tatwãhɗe dit ərayɗe diyɗa, Wakəmsak əppam madaramə. Wakəmsak əsilgu səddəvit vovɗe naka dəlvafuŋ.

²¹ Wakəɓaygən gagdak nawa, wakəkkpaŋ əffeten makrawa.

²² Naw wanəɗi ki moggon nok də gəzləŋtəndəŋ Maŋgəlva nawa; də koku nədalvoko, salala na Israyel!

²³ Wanəlvoko, maw wayə gəlya də ənneke, vi kəbitik zeŋgilewa.

²⁴ Hərzlumu wapel aka təstəs nok pay pakə, vi məkayanən əray naw pak wil wadenni, tahəŋ simbim simbimi.