Gəlyaɗe 7 - Bible en Guidar

Yawe, ataw su wən nawa

1 Əɓuhma na Daviti.

¹ Əɓuhma na Daviti. Aya gəlya nan sən Yawe, aka əpel na Kus mə Benyamin.

² Yawe, Maŋgəlva nawa, azoki nədawɗama; akõhgu səvet məzərmaŋ mama azaw pakə, atərwa!

³ Vi adawpiwenən gəɓa zu pesek pesek va ɓoolu, məza ɗəf tay nawtəru ɓa ɓa.

⁴ Yawe Maŋgəlva nawa, an nəɗɗak zəgaska: an mbərayən tay a dakgrakay vawa,

⁵ an nəmndagan sənək mbərayən sən məzuvay zazaya, gəm an nəmõhõnək məzuzel naw kurok sən ɗarə,

⁶ asna məzuzel naw dərɓahaw dərmuwã, dəndapan zeŋgilew aka dəlvafuŋ, gəm dəbbuhon gagdak naw aka burɗuku! Əziwe

⁷ Asili Yawe, də wədagədəva! Aday ki gəgay net məzuzelɗe nawa, aguwa, is mətawwən təstəs!

⁸ Wəsap net ɗiy wakar kiyko; asok a disiŋ akani!

⁹ Yawe wasan mətawwən aket ɗiyi: apəlwa Yawe vi təstəs gəm bartata nani.

¹⁰ Mbərayən net məsdarawɗe dəbayman kana! Wakəɓɓəlan ɗəf an təstəsə! Də əsəŋglan mekret ɗiy gəm kpukpum naɗɗum neti Maŋgəlva an təstəsə.

¹¹ Maŋgəlva yi baray nawa, məkõhgit ɗiy məs mekret barə.

¹² Maŋgəlva mətawwən təstəsi yi, Maŋgəlva məggbok haran pay paki yi.

¹³ An məs mambray dəɗi marava ɓa, tay ətakaɗan masalam nani, tay ənslin bəle nan avan kawə̃.

¹⁴ Nan azaɓək zəgeɗ nawbay ɗəfa, aynetik herɗe nan dis məs offo a meti.

¹⁵ Məs də əɗɗum mbərayən a makran, wazəm sahã, wawə wəna.

¹⁶ Məs dəso' vov kpum aba ɗəfa, wabət addəv vov vani.

¹⁷ Tatwãh nan wakkpaŋ akani, daraw nan wamndan aka bəbər kini.

¹⁸ Wanəɗi ki Yawe sən təstəs nani, wanəyə gəlya də iya na Yawe Məsəɗəɗə.