Gəlyaɗe 69 - Bible en Guidar

Vaŋvəl naŋgla əbbaha

¹ Səza daya net məyaŋgəlya aka gəzləŋtəndəŋɗe na Davit.

² Maŋgəlva akõhguwa, vi iŋkile agulwənək hã awlawa.

³ In tat ətəpa ara ndərɓa kpukpumo, əziw tay ɓa. Nəguluk addəv kpukpum na pehe, helege net iŋkile atəpguwəka.

⁴ Nəyək əŋzla vaŋvəla, wəlaw akəlka; haraw ayək dawga Maŋgəlva nawa.

⁵ Məzuzelwən ɗar adayaŋgək ki muhur kiywa; məzəŋglaŋ əzawən gboŋgboŋ əŋgə. An məs in nəmõh ɓa, in urəkən.

⁶ Maŋgəlva, nok kəsənək dərwa nawa, heslepeɗe naw dəɗamaŋ səma horok ɓa.

⁷ Wil adawdenin ɗiy məs dəɗiynən əɗɗum net akok ammbaw ɓa Daya Yawe Məzuɓappak. Wil adawdenin məzukoyokun aka wən naw ɓa, Maŋgəlva na Israyel.

⁸ Vi aka wən noki yi nədawba əra, wil araw pa'əŋgə,

⁹ Milmiŋgiɗu dəsənwən ɓa, malaka nan azet kirtit əmma.

¹⁰ Vi əŋgla na gəla nok tay əzlu a makrawa; əra net məzurokun aggbo'uk akawa.

¹¹ Nəhəmək də wəɗɗa meme, ya akkpaŋsuwək əra.

¹² In kulo' zəga na gəlabaya, yaŋ nəkkpaŋ va zəga na mamba azeti.

¹³ Ɗiy a meŋgle ɗewɗew əpeleŋ wən akawa, nəkkpaŋgək va zəga na gəlya net məsaŋ mbazla.

¹⁴ Yawe əkkam naw yana: pay nawla sãhã na; Maŋgəlva məs moggon nan metiŋ, azlan suwa, istə məzukõhgu gegesiŋ.

¹⁵ Agdəhu səra ndərɓa; nədawgək ɓa; nəkõhgən səvet ɗiy dədawzelwəni gəm səddəv kpukpum net iŋkile!

¹⁶ Kəta iŋkile adawkuwən ɓa, əpilmis net iŋkile adawsulupwən ɓa; vov adampan man akaw ɓa.

¹⁷ Azlan suwa Yawe; vi əɗɗa moggon nok lewi yi; va ulasasãh nok asan metiŋgini, akkpaŋ azawa.

¹⁸ Kəɗaman horok sən gawla nok ɓa. In tat əzəmsahã; azlan su də kakara.

¹⁹ Azar azawa, akõhguwa; məzuzelɗe naw tahəŋ, abitwa.

²⁰ Nok kəsənək na mərawi yi, kəsənək wil nawa gəm simbim simbim nawa; məzuseɓɗe naw pak tahəŋ aboko.

²¹ Wəra assanək makrawa, ayawka; nəɗɗumuk nawrəh əbbah kəta, ya sam ɗarə; nərah ɗiy nazzayan su makraw ɓa.

²² Aɗɗaŋgək mufut ara way nawa, sit meme nawa, azlər suwən moɗokroy.

²³ Maway net dəkkpaŋ bizwil abeti! Sit beyneŋgiɗit tam mazzaɗə!

²⁴ Heret dətip adawlaŋ ɓa; aɗɗa gəɓet dəsan ɓe'e.

²⁵ Herɗe nok dəssoŋ aketi; ədagədəv nok dərufe.

²⁶ Gəla net dəpiwi, ɗəf adawsan a gizlirke anetda ɓa,

²⁷ vi tahəŋ ərɓahanən ɗəf an kərgə, tahəŋ əpeleŋ aka əzəmsahã net ɗiy kərgə.

²⁸ Aŋɗan sit heslepe aka heslepe; adawrahaŋ əvvuy mambray net ɓa.

²⁹ Iya net dəvvuy səddəv ɗerewel na zeŋgile, kədawverit aret ɗiy en təstəs ɓa!

³⁰ Naw məssahã nan məzəmsahã, əkõh nok waɗiyu zeŋgleŋge, Maŋgəlva.

³¹ Wanəɗi ki iya na Maŋgəlva də gəlya, gəm wəkaɓgən də wəfet akani.

³² Anani Maŋgəlva aŋgəl day ki wasliya, may medgeɗge də mohõn gəm eperkeperkeni.

³³ Məɓegənən ki zit wawlanəni, wannekeŋgi. Məkayanən Maŋgəlva, ənziya nokum dəzzeki!

³⁴ Vi Yawe tay əprəm sit məssehẽŋɗe, awzel ɗiy nan an mərmet ɓa.

³⁵ Məɗi kiyən, disiŋ, dəlvafuŋ, peheɗ dit zəgeɗ məŋgusiŋgusiŋ naddəvit pakə!

³⁶ Vi Maŋgəlva wakõhgən Siyon, warket walaŋgəleɗe gugriɗ na Yuda. Ɗiy wassoŋ də gəla adaka, wasan ka neti.

³⁷ Mazlalwẽt gewleɗ nan wazəmaŋ gəla azani, məs dəŋgluwnən iya nan wassoŋ də gəla adaka.