Gəlyaɗe 68 - Bible en Guidar

Gəlyanalva nawtaf Maŋgəlva məskəwəla

¹ Səza daya net məyaŋgəlya. Gəlyanalva na Davit. Gəlya.

² Maŋgəlva dəsili, məzuzelɗe nan dətərayaŋgə, gəm məzuseɓɗe nan dənzoŋ sə ma harani!

³ Va enene adawtərayaŋgə, vas kədawtəraygiti: va timbe adawwer akoffo, vaski yi məs mambrayɗe adawzaŋ səba Maŋgəlva.

⁴ Ya ɗiy en təstəs wannekeŋgi, waɗiyaŋ salalay aba Maŋgəlva, zit mamyãk mamyãk də ənneke:

⁵ Miyə sən gəlya sən Maŋgəlva, məlvan iya nani; məkol tive sən məs dəsan kərəkka aka slaybuwna. Iya nan na: Yawe; mənneken zukum abani.

⁶ Afit mitiweɗi, mətawwən net gil net gəbayɗe təstəsə, vaski Maŋgəlva a təki nassa nan salala.

⁷ Maŋgəlva məzəpsit gəla sit məza ɗiy net ɓa, tay əgilgit məfərsəneɗ səket ngiyamɗe, ɗiy məɓoŋgit kaka dədassoŋ aka kpokpõhõ.

⁸ Maŋgəlva gala kəgil abet ɗiy noko, gala kədaw abet a kapta-muyã, Əziwe

⁹ dələv aɓəlka, disiŋ ametik iŋkile loklok aba Maŋgəlva an na Sinay, aba Maŋgəlva, Maŋgəlva na Israyel.

¹⁰ Maŋgəlva, is tat əzi buwən gədakə, ɗiy nok addakaŋgək kəta, ya kəsilgitike.

¹¹ Dələv nok məs assoŋ akani, istə kəɗiya, Maŋgəlva aka moggon nok sən məssãhã.

¹² Yawe aɗiyək wəna, gil en maslənɗe nan gba dula metiŋ.

¹³ Milyeŋge dit məzəlpaŋ ənzoŋ koyayaya, ɗak təsat eŋgil watuɗak zəgeɗ nawrəh na ma əgaya.

¹⁴ Nokum ɗufɗuf a dibirgidik sa? Bəŋga na maha dayday persleket tay də təbəz babara, gəm deɓeken va meleŋge.

¹⁵ Gala Maŋgəlva Məzuɓappak adawtreyet milyeŋge, ɓeɓrezlerizze tahəŋ əɗɗa fitfit aka gərəm na Salmon.

¹⁶ Mossorgo metiŋ na Basan, mossorgo metiŋ an dəɓay day yi, mossorgo metiŋ na Basan, mossorgo metiŋ məs kiyən ɓaɓay yi.

¹⁷ Mossorgo metiŋ məs kiyən ɓaɓayə vimi kədaɗɗa kotorok na mossorgo metiŋ məs Maŋgəlva aŋgəl nassa akan di? Maŋgəlva wasan akan faɗə.

¹⁸ Mawteɗ na Maŋgəlva gabalɗe kaklawɗeŋgə. Yawe tay a weleŋti, a Sinay addəv Gəla na Maŋgəlva!

¹⁹ Kəpeŋgik a disiŋ adaka; kərəmək məfərsəneɗi, kətafək əvəl səvet ɗiy, may səvet məɓoŋgit daydayə, vi kawrəh təki nassa, Yawe Maŋgəlva!

²⁰ Soko sən Daya pay pakə! Maŋgəlva vanəs məzəslga sləma aka əkõh namə. Əziwe

²¹ Maŋgəlva nam, Maŋgəlva məkõhgən ɗəfi, maddambeɗe namta na, na Maŋgəlva Yawe əŋgə.

²² Ya Maŋgəlva wakrap kiyit məzuzelɗe nani, kiya məs muhur silipsilip məsan sən əbaygəbaya.

²³ Daya aɗiyman na: «Wanəmilgit sə Basan, wanəmilgit səddəv kpukpum na pehe,

²⁴ vi kəndepetgin də tuluk aret mbeli, kirɗe nok dərahaŋgən əzəm haran net səza kiygəbayit məzuzelɗe noko.»

²⁵ Maŋgəlva, mulani vanday noko, vanday na Maŋgəlva nawa, na məlĩ naw addəv Gəla na Maŋgəlva!

²⁶ Miyaŋ gəlya abe, məffoŋ zəga dirɓe, addak təkiya, kirin muguluŋgit tay əbayaŋ gaŋga.

²⁷ Addəv əkkala, məfet aka Maŋgəlva, Yawe, təŋ sə gbugburzlo Israyel.

²⁸ Benyamin tabuwa nammbet dədawketi, deyeɗe na Yuda də vanday neti, deyeɗe na Zabulon, deyeɗe na Neftali.

²⁹ Maŋgəlva nok aɗiyək wən nan na: arban gbogboŋ noko Maŋgəlva is məs kəgay ambaməŋka.

³⁰ Səddəv gəla nok dəsan aka Yerusalem, a təki milyeŋge adawkiyaŋ sukun əvəla,

³¹ ahãyãn zəga mamayã səddəvit vəlarɗe, ngaɓa net medgeɗgeɗe dit en net kirit wasliɗe net ɗiy-ɗarə, məɗɗaŋ sukun kupkup dit deleɗ neti. Andolet ɗiy mənnekeŋ də əgaya.

³² Məsaryeɗ wazzoŋ sə Eziptə, mə Etiyopiɗe watəlnən vet ənzoŋ aza Maŋgəlva.

³³ Kiyva net milyeŋge naka dəlva, məyə sən gəlya sən Maŋgəlva; məlvan Daya. Əziwe

³⁴ Miyə sən gəlya sən Maŋgəlva məs dəpeŋ aka mawta net pilseŋge nan hã a disiŋ ndən məs dəsan farfar a disiŋ. Yaŋ tay ərban wəlan, wəlan holoŋ holoŋgu.

³⁵ Məpsən gagdak na Maŋgəlva. Məlĩ nan aka Israyeli, gbogboŋ nan aka slaybuwni yi.

³⁶ Maŋgəlva, nawgeslne'suk kənan hã səddəv gəla noko. Maŋgəlva na Israyel dədapsit gbogboŋ də wəɓap sit ɗiyi. Soko sən Maŋgəlva!