Gəlyaɗe 66 - Bible en Guidar

Wəɗi ki Maŋgəlva məbit ɗəfa

1 Səza daya net məyaŋgəlya. Gəlya. Gəlyanalva.

¹ Səza daya net məyaŋgəlya. Gəlya. Gəlyanalva. Dələv gboŋ mərga vokum sən Maŋgəlva.

² Məlvan gagdak na iya nani, məgagdakan də əɗi kiyni.

³ Mənah sən Maŋgəlva na: «Wəzaɗe nok naggət aketiŋgə! Aba memetin na gbogboŋ nok na, məzuzelɗe nok tahəŋ əkiyaŋ sukun ma neneke.

⁴ Dəlvafuŋ gboŋ dəppu' aboko, dəlvokuni, dəlvanən iya noko.» Əziwe

⁵ Məde, mule wəzeɗe gugriɗ na Maŋgəlva, naggət aketiŋgə. An agəɗ aka ɗəf titire.

⁶ Akkpaŋganək pehe ka təki məklakani, aggaraŋgək ki məlpa də tilti; ndəni mədannek dəndəni.

⁷ Də gurom nani yi, azəm məlĩ hã faɗə, haran tay əteɗ ɗiy-ɗar pakə; məɓoŋgit adawsilyoŋ akan ɓa! Əziwe

⁸ Ɗiyi, məfet aka Maŋgəlva namə; məslan wəlokum də wəɗi kiyni.

⁹ Ndəni dəɗiyəm madaramə, dəppan tələm ətaŋgbãy ɓa.

¹⁰ Aw Maŋgəlva, kəsləməka, kəsləmək va adawslaŋ təbəz babara.

¹¹ Kəkiymək aka bizwil, kəɗiyək zəga gagdak agzemə.

¹² Ɗiy ɗar tay əzəmaŋ məlĩ akamə. Mətoŋguk akoffo gəm aret iŋkile, yaŋ kəgilgəm aka waynabaya.

¹³ Wanətoŋ addəv gəla nok də əvəl nawzla kurmbuɗuku, wanəɗɗa suk an maw aynə suko,

¹⁴ məs maw akol apel addəv əzəmsahã nawa.

¹⁵ Wanipsuk zəgeɗ memeyẽɗ məkirit naɗɗa əvəl nawzla kurmbuɗuku, sap də hõhõy na sluwit ndergeyẽɗi; wanətaw suk wəlet medgeɗgeɗe dit murgoŋɗe. Əziwe

¹⁶ Məde məprəma, wanəboton an Maŋgəlva agəɗ viyu sit məgeslne'eŋ sənən pakə.

¹⁷ Gala nədawyani, wəɗi kiya əsilgən hərzlumwa.

¹⁸ Va nəɗɗumuk mbərayən a makrawa, Daya aprəmsu na kəta ɓa.

¹⁹ Ya Maŋgəlva aprəməka, apakək sləman ammba əkkam nawa.

²⁰ Soko sən Maŋgəlva, vi dəzgan əkkam naw ɓa, may moggon nan faraɗa səzaw ɓa.