Gəlyaɗe 65 - Bible en Guidar

Maŋgəlva, kədahək nawɗi kiyko

¹ Səza daya net məyaŋgəlya. Gəlyanalva na Davit, gəlya.

² Ɓatɓat zlaŋ, azok na əɗi kiyuki Maŋgəlva an na Siyon, ya suki wiynama adaknaha.

³ Ɗəf pak wagap azoko, vi is məzəprəm əkkama.

⁴ An nəraygən də əpel naw diyɗa yi. Is tat əvvuyẽt mambrayɗe namə hara.

⁵ Ɗəɗah na ɗəf an kuweli, wasan adaŋgla anokda! Waməbə də zəga moggon neŋgil anokda. Zəgeɗ salala naddəv gəla noko.

⁶ Maŋgəlva məkõhgəmə, də təstəs kədawzlan səm dit zəgeɗ na sekene, avoki yi mammba dələv gboŋ faraɗa hã met peheɗi.

⁷ Tay əsɓet mossorgoɗe gugriɗe də gbogboŋ nani, aynanək dadakan də gurom.

⁸ Aɓətgənək gogoyo net peheɗi, gogoyo net vovolumɗe neti, də wəhãy net ɗiyi.

⁹ Ɗiy naka dələv gboŋ tahəŋ əgeslne'eŋ abet zəgeɗ narba noko; is tat ənneken zit ɗiy nammba pay nampum dit en nammba pay na moskoyo.

¹⁰ Kəbbalanək dəlvafuŋ, kəlɓanəka; kəpsənək arya diyɗa. Məlpa na Maŋgəlva aknahək dit iŋkile, vas kədawzaɓan haykəmari neti, vi vaski kədawzaɓan dəlvafuŋ:

¹¹ Is tat əlɓet barayɗe nani, də wəziyan təki an ɓorzloɓorzlo, is tat əlyuɓun də buna, is tat əzaɓan an dədawgilyeni.

¹² Kəpsənək gagdak sən əzva də moggon noko, dəka batamuk kətoŋ pak zəga tay əɗɗa ndoɗoɗndoɗoɗu.

¹³ Təki nawtaɗ na kapta-muyã tay wirwiri, mossorgoɗe tahəŋ ənnekeŋgi.

¹⁴ Təki nawtaɗ aknahək dit gilewi, walaŋɗe aziwgininik haykəmari; ɗiy tahəŋ ənzlaŋ vaŋvəla gəm iyaŋ gəlya.