Gəlyaɗe 62 - Bible en Guidar

Go'o də Maŋgəlva na wanəsaw fendeŋgi

¹ Səza daya net məyaŋgəlya. Va səma Yedutun. Gəlyanalva na Davit.

² Aza Maŋgəlva na wanəsaw fendeŋgi, əkõh naw səzan adazzani.

³ Vaski, ndəni milɓe nawa, əkõh nawi, təki nawɗam nawi. Nəkker na ɓa.

⁴ Hã gap dewe kədappanən əkkal baymokum pak aka ɗəf kawbayən va adaɓzlaŋ gəla məs dəɓe'i, awaniɓa va zlava məɓzluwən di?

⁵ Ha'aw aka wən na gagdak nani, tahəŋ əɗɗumoŋ nawzani; zit nek də uwawəna, əpel na met na əzaɓi, kpukpum na mekret na, mahanay adaɗɗaŋgə. Əziwe

⁶ Ha'aw, wanəsaw fendeŋ aza Maŋgəlva; vi əga naw səzani adazzani.

⁷ Vaski, ndəni milɓe nawa, əkõh nawi gəm təki nawɗam nawi. Nəkker na ɓa.

⁸ Aza Maŋgəlva yi əkõh də gagdak nawa. Milɓe naw an gboŋgboŋgu, təki nawɗam naw aza Maŋgəlva yi.

⁹ Məɗi əɗɗum nokum akan pay pakə, munokum ɗiyi; məkol mokrokum abani; Maŋgəlva təki nawɗam nami yi. Əziwe

¹⁰ Ha'aw, ɗəf titir va enene yi ɗarə; ɗəf titir uwawəni kaka'ə. An məslani gagdak net sap na, kofot kofotəŋ dayki enene.

¹¹ Kədawɗiynən əɗɗum nokum aka ərəh də vurum ɓa, may ərəh nawmõh dəmõh ɓa. An arya nokum tay uwan zəni, kədawɗiynən mokrokum akan ɓa.

¹² Təl taka na Maŋgəlva apelke, ɗayɗay nədaprəm Maŋgəlva van ənəh na: «Gbogboŋ nawi.»

¹³ Moggon noki Yawe, is tat əfaɗ sən ɗəf va aza wəza nani.