Gəlyaɗe 59 - Bible en Guidar

Maŋgəlva nawa akõhgu səvet ɗiy məkayanən mawa

¹ Səza daya net məyaŋgəlya. Aka gəlya məyan də wəla na: «Kəraygən ɓa». Gəlya na Davit. Gala Sawlu aslən əga gəla na Davit kawbayni.

² Maŋgəlva nawa abitu səvet məzuzelɗe nawa, agu səvet məzusilyoŋ akawa.

³ Abitu səvet məɗɗaŋ mbərayni, akõhgu səvet məbayaŋ gəbaya.

⁴ Vi yeŋki, avoŋgoŋ suwənək tive; məs gbogboŋɗe tahəŋ ətuvuroŋ wən akawa. Ya nəɓoŋ akok ɓa, nəgəɗ mambray ɓa Yawe.

⁵ Nəraygən ɓa, ndəɗaŋ əzzoŋ əzaɓan ziti. Afɗahə, ade aləm suwa, kulagəni.

⁶ Isi, Yawe Maŋgəlva Məzuɓappak, Maŋgəlva na Israyel, Afɗahə, afaɗ sit ɗiy-ɗar pakə, məzəmaŋ kiyit ɗiyiŋ pak kula sasẽhĩt ɓa. Əziwe

⁷ Əmilyoŋ də moskoyo, əharaŋ va kirɗe gəm əsuləkaŋ ki walaŋgəla-metiŋ.

⁸ Wən tatrãh tay əgilyen sə meti, metteɓ met tay əgilgən əpel va masalam. «Ya naway naprəmən di?»

⁹ Yawe, nok is tat əmas aketi, is tat ənah wən azet ɗiy-ɗar pakə.

¹⁰ Akok nədawɗi gbogboŋ nawa, Vi Maŋgəlva yi təki nawɗam nawa.

¹¹ Maŋgəlva məgəɗ moggon tay əzzan abawa Maŋgəlva dədarbet su məzusekeɗwəni.

¹² Kəbey ɓa, vi ɗiy naw adazgətaŋ ɓa, atəwəlet də gbogboŋ noko, azlbe, Yawe, baray namə.

¹³ Met tay əɗɗa mambray də əpel na meti. Wəkaɓ net warme, aka mahanay net də uwawən adawwaŋgə!

¹⁴ Agrek net herɗe, agreke adappaŋ ɓa! Kawsənni na, Maŋgəlva yi metiŋgin aka Yakob, gəm ammba dələv gboŋgu. Əziwe

¹⁵ Əmilyoŋ də moskoyo, əharaŋ va kirɗe, gəm əsuləkaŋ ki walaŋgəla-metiŋ.

¹⁶ Ndəɗaŋ əbbalaŋ əkay əzəma, an dəbaŋ ɓa na, asna ndəɗaŋ kim ənɗəsaŋgə.

¹⁷ Ya wanəlvan gbogboŋ noko, wanəɗɗəl də wənnek də pummo aka moggon noko, vi istə təki nawɗam nawa, təki nawɗam naw pay na tatwãhã.

¹⁸ Gbogboŋ naw kənani, wanəlvoko, vi Maŋgəlva təki nawɗam nawi, Maŋgəlva naw məgəɗ moggoni.