Gəlyaɗe 58 - Bible en Guidar

Maŋgəlva yi mətawwəna

¹ Səza daya net məyaŋgəlya. Aka gəlya məyan də wəla na: «Kəraygən ɓa». Gəlyanalva na Davit.

² Gesiŋ əssa ɓatɓati ətawwən sa? Mənokum ɗiyi, vaski ətawwən də tiven sa?

³ Nzeɗ kədaɗɗaŋ mambraya, mənokum kədawanən gagay aka dəlva.

⁴ Məsdarawɗe arayaŋgək tak səddəv dəgzlumti; təŋ səddəvət meti, slorslorəŋgə, muwaŋ wənəŋgə.

⁵ Tahəŋ də muwən va na barway; tahəŋ əsuk sləmet va bomtoro,

⁶ məs awɓe' sən əpel net məs manenekɗe ɓa, may na məskokono dəsən ədapan ɗəf ɓa.

⁷ Maŋgəlva akkpay sleyit səmeti, Yawe wahõk polkomit kirtin ɓoolu.

⁸ Dəddoŋ va iŋkile məzudawaŋgə! Dəhõti, dəddakaŋgəni.

⁹ Dəssoŋ va ambalyãmbalyã məzəddan mefɗe tolorro! Va daway məkiyən dula pay ɓa!

¹⁰ Tak mesteɓeɗ nokum adawsənən na məsɗay offo net degirgeɗ ammbeti, hiɗhiɗ va ədagədəvi, wapalkete.

¹¹ Ɗəf təstəs wannek də ula əmpəlkiya na Maŋgəlva, wayop tələn aret mbel na məsdarawə.

¹² Ya ɗəf wanah na: «Ha'aw, ɗəf təstəs warah iya nani, ha'aw, Maŋgəlva yi nawtawwən aka dəlvafuŋ.»