Gəlyaɗe 57 - Bible en Guidar

In tat iya Maŋgəlva Məsəɗəɗə

¹ Səza daya net məyaŋgəlya. Məyan də wəla məs adawyaŋ na: «Kəraygən ɓa.» Gəlyanalva səddəv gəlya na Davit. Gala adanzan səba Sawlu a bətəŋ.

² Awla sasãhwa Maŋgəlva, awla sasãhwa, vi azok nəɗamə; ara zeŋgile perslekok nədawɗama, hã gap əray toŋgu.

³ In tat əhəm sən Maŋgəlva Məsəɗəɗə, sən Maŋgəlva məgəɗ su moggoni.

⁴ Sə disiŋ adawslən əkõhguwa, arbəsənək wil sən məzusər mawa, Maŋgəlva waslən moggon nan də gegesiŋ nani. Əziwe

⁵ In tat a weleŋgit ɓooliɗe, ɗuffo, məzəmaŋ ɗiyi, sleyit tay va tulhõ gəm va herɗe, hərzlumit tay va masalam məs mani.

⁶ Maŋgəlva, aziw aka disiŋ, gagdak nok dəday ki dəlvafuŋ gboŋgu!

⁷ Enslininik mazzaɗ aka tivewa, adoɗənək kiywa, aso'oŋguk vov abawa, askotoŋ addəvən. Əziwe

⁸ Asɓan makrawa Maŋgəlva, asɓan makrawa, wanəyə gəlya, wanəlvə.

⁹ Afɗahə gəɓa zuwa, gazaŋvəl də gaŋgara nawa məfɗahə, wanəfɗahan bapummo.

¹⁰ Wanəɗi kiyuk aret ɗiyi Daya, wanəlvok də gəlya a weleŋgit ɗiyi,

¹¹ Vi moggon nok asilik hã disiŋ, gəm gesiŋ nok hã aza slaybuwna.

¹² Maŋgəlva, aziw aka disiŋ, gagdak nok dəday ki dəlvafuŋ gboŋgu!