Gəlyaɗe 56 - Bible en Guidar

Əkkam na ɗəf məsərmani

¹ Səza daya net məyaŋgəlya. Va ɓaɓəlma əhəm nat «bəŋgak na maha səka faraɗa». Gəlya na Davit. Gala mə Filistiɗe armanən a Gat.

² Aw Maŋgəlva awlu sahə̃, vi ɗəf tay əzəmgu sahã; pay pak tay əgay də iyna, əsər mawa.

³ Məzusekeɗwən tahəŋ əsərən maw pay pakə; ya məzugayaŋ də in diyɗaŋgə, aw Maŋgəlva na disiŋ.

⁴ Pay nəgeslne'i, akok nəɗi əɗɗum nawa.

⁵ In tat əɗi ki Maŋgəlva sən əpel nani, aka Maŋgəlva nəɗi əɗɗum nawa, nəgeslne' na ɓa. Ɗəf titir mi adawgəɗ su di?

⁶ Pay pak tahəŋ əsərən maw aka əpel nawa, əɗɗum net pak nawgəɗ su mbərayni.

⁷ Ətuvuroŋ wəna, əsoroŋgu; heret yarra ammba təlwa, əkayanən zeŋgilewa.

⁸ Vi mambray na, azet na wakohõŋ sa? Maŋgəlva, azlbe də ədagədəv noko!

⁹ Nok kəŋɗanək təlu aka slorslor nawa; azi sin naw addəv kwenekwene noko, tay addəv ɗerewel nok ɓa sa?

¹⁰ Pay nəyuko məzuzelɗe naw əmndoŋ dirɓe; azan nədawsənnən na, Maŋgəlva nawi.

¹¹ In tat əɗi ki Maŋgəlva vi əpel nani; in tat əɗi ki Yawe, vi əpel nani.

¹² Aka Maŋgəlva nəɗi əɗɗum nawa, nəgeslne' na ɓa. Mi ɗəf titir adawgəɗ su di?

¹³ An maw aynə suk tay akawa Maŋgəlva, wanəɗɗa suk də əzaɓ-Maŋgəlva nawfete.

¹⁴ Vi kəbitwək səka əmta. Kətakək təlu dawtaŋgbãya, vi nədawgən abok addəv əkeɗeɗe net ɗiy medereti aw Maŋgəlva.