Gəlyaɗe 55 - Bible en Guidar

Əkkam na ɗəf məzəm kiyən

¹ Səza daya net məyaŋgəlya. Dit zəgeɗ nawbay məs helegeti. Əpel-məmyã'ən na Davit.

² Maŋgəlva apak sləmok ammba əkkam nawa, kədawɗam sən əkkam naw ɓa.

³ Azgə sləma akawa, azlan suwa. Slorslor nan əɓuh mawa, in tat əŋɗəsa,

⁴ sən əprəm əpel na məzuzel nawa, də vavyak na məsdaraw, vi tahəŋ əggbo'nən mbərayən akawa, nawda gədəv adawsərnən mawa.

⁵ Makraw tay kəlɓəs kəlɓəsə, geslne namta armuwəka.

⁶ Geslne də kərkər agulwənka, əkker agəmwəka.

⁷ Yaŋ nəmna: «Va in tat də perslekew va na bəŋga na maha na: “Kəta wanəveŋ wanərah təki nawsawa.

⁸ Kəta wanənzaw faraɗa, kaddaŋ təki a kapta-muyã”. Əziwe

⁹ Wanəmbat də kakara a təki nawɗam sən səmyã na barkataŋ.»

¹⁰ Daya azlzlaɓan kiyti, awɗakan əpel neti. Vi gagay də əgayi kaka' nədawla a walaŋgəla-metiŋ.

¹¹ Tahəŋ əsuləkaŋ dəka zlava nan kapay də dəfəɗa. Addəv walaŋgəla-metiŋ vani, mbərayən də əzəmsahã;

¹² addəv walaŋgəla-metiŋ vani, əbaygəbay tay. Əsərma də vurum, awzaraŋ sə təki nan ɓa.

¹³ Məzuzel nawi məzunah wən azaw ɓa; ya wanəɓəsa. Məzuzelewi dəsil akaw ɓa; wanəɗam faraɗa sə maharani.

¹⁴ Ya istə ɗəf va iyna, baynaw na makrawa, məs nəsərək dəndəni!

¹⁵ Ndən məs mədazga meŋ nenek na mahaɗamma matakə, mədabbal addəv gəla na Maŋgəlva matakə.

¹⁶ Əmta dəde aketi, diprikeŋ a vov medereti, vi zəgeɗ mbəreyit tahəŋ anetda, tahəŋ addivti!

¹⁷ Naw Maŋgəlva nədawhəm səni, Yawe wakõhguwa.

¹⁸ Moskoy də pummo gəm tataŋ paya, in tat əɓuh mawa, in tat əŋɗəsa. Aprəmək wəlawa.

¹⁹ Akõhguwək zay səma əlpa; gala ɗiy diyɗa adawgayaŋ də iyna.

²⁰ Maŋgəlva waprəma, wazlan siti, ndən məs dəsan aka mazaŋga na məlĩ farfarə! Əziwe Vi net əddəɗ tay ɓa, awgeslne'eŋ sənən Maŋgəlva ɓa.

²¹ Ɗəf nan aslanək van aket beynegiɗin, araygənək wənmiyna nani.

²² Man ligisligis də mẽlẽ, ya makran tay əgaya. Əpel nan nek day ki mẽlẽ, ya va slõhõŋɗe miptiwtiŋgə.

²³ Azgan zəga gagdak nawsla nok aka Yawe, nan warma voko, appan na ɗəf təstəs kpak əskot ɓa.

²⁴ Maŋgəlva, nok wakəprikgit addəv magamas man viŋgi. Ɗiy məbayaŋ gəbay dit məsvurumɗe assoŋ mederet pəɗak na ənziya net egge ɓa. Ya naw akoki nəbay vawa.