Gəlyaɗe 52 - Bible en Guidar

Əpel aka ɗəf dəppan kiyən sən arya nani

¹ Səza daya net məyaŋgəlya. Əpel-məmyã'ən na Davit.

² Pay Do'ek mə Edom ade əssak sən Sawlu, yaŋ aɓsən na: Davit alək eŋgil ana Ahimelek da.

³ Vimi kədawkaɓ addəv əɗɗa mbərayən is gambara di? Moggon na Maŋgəlva pay paki yi.

⁴ Hərzlumuk tay əɗɗum əbaygəbaya; va slõhõ mətakaɗ man, hərzlumuk adaɗɗa vurum.

⁵ Mbərayən kəŋgəl day ki əɗɗa moggoni, tepelke day ki əpel təstəsə. Əziwe

⁶ Əpel nawraygən wən kəŋgələ, hərzlumuk na vurumi.

⁷ Maŋgəlva wazok hã faɗə, warmuko, wagdəhuk sə gizlirkə anokda waptuwuk səka dələv net medereti! Əziwe

⁸ Ɗiy en təstəs wawlanəni, wageslne'eŋgi, wamasaŋ akani.

⁹ Ɗəf yaŋ məza dəɗi Maŋgəlva ka təki nawɗam nan ɓa, aka diyɗa na arya nan əɗɗum nan asani, gboŋgboŋgi addəv əbaygəbay an adawbaya.

¹⁰ Ya naw in tat addəv gəla na Maŋgəlva va hereme məzundufo; aka moggon na Maŋgəlva nəɗi əɗɗum naw pay pak hã faɗə.

¹¹ Wanəfet akok hã faɗə, vi kəɗɗaka. Əga naw aka iya nok nəɗiya, vi moggok kənan azet ɗiy noko.