Gəlyaɗe 51 - Bible en Guidar

Wəkkam nawrəh əvvuy mambraya

¹ Səza daya net məyaŋgəlya, Gəlyanalva na Davit.

² Gala məskəleŋ Natan ambat azan na, Davit avoŋgətək Betsabe səkay.

³ Maŋgəlva, awla sasãhwã, vi moggon noko; vi ulasasãh nok man awsla ɓa, avvuyon su heslepe nawa.

⁴ Askoɓ heslepe naw gərakə, abburu səza mambray nawa.

⁵ Vi nəsənək mambray naggbakma nawa; mambray naw tay ama haraw ɗayɗayə.

⁶ Azoki, azok kaka' nəgəɗ mambraya, nəgəɗək zəga mbərayən ama horoko. Təstəsi an kəpelke, kawzelen suki an kətawək wən nan ɓa.

⁷ Addəv heslepe məwuw yaŋka, addəv mambray əmma təɗi daway nawa.

⁸ An kəŋgəl aza ɗəf na, dəsan də gegesiŋ a makrani, Addəv mahaɗamma na, maɗɗula kədarbə suwa.

⁹ Avvuyon mambray naw də isop, wanəsaw saksakə; askoɓwa, wanəsaw babar day ki gaɓmayã.

¹⁰ Aɗɗa ka nəprəmgən wəɗɗəla də wənneke. Sleŋsləŋɗe kəŋzletiŋ dəskəlaŋgəni!

¹¹ Akkpaŋgan horok səka mambray nawa, avvuyet heslepeɗe naw pakə, wanəkkpaŋ babar daykiyit ɓeɓrezlerizze.

¹² Aw Maŋgəlva, azəməɗ su makra laɗaɗa; ampa əmpəs meggeɗe addəvwa.

¹³ Kəzgaw faraɗa sə mahorok ɓa, kəmndok əgəm Əmpəs na salala nok səzaw ɓa.

¹⁴ Avay ənnek na kəkõhguwa, gəm kəta əmpəs nawvəl dərma vawa.

¹⁵ Waniyagan tive nok sit dədawɓoŋgoŋ akoko; məs mambrayɗe wamndoŋ azoko.

¹⁶ Akõhgu səzet mbeli en nəggbo'u Maŋgəlva, Maŋgəlva məkõhguwa; hərzlumu dəpelgən təstəs noko.

¹⁷ Daya, akol metteɓ mawa, maw dətibirokgəni.

¹⁸ Vi kannek də əzaɓ-Maŋgəlva ɓa, kəta ɓa na wanədə suko. Ya kaŋgla əvəl nawzla kurmbuɗuk dayday ɓa.

¹⁹ Əzaɓ-Maŋgəlva məs Maŋgəlva aŋgəl na, maɗɗula an lumbu'lumbu'u. Maŋgəlva, kəzelen na makra ɗəf an lumbu'lumbu' gəm məvoŋgən kiyən ɓa.

²⁰ Agəɗ moggon a Siyon addəv ulasahã noko, arket zlavaɗe na Yerusalem.

²¹ Vasna nok əzaɓ-Maŋgəlva temtem də tiven kədaŋgla, əbburo gəm əvəl nawzla kurmbuɗuku; kawtawi wəlet medgeɗgeɗe aka matuya noko.