Gəlyaɗe 49 - Bible en Guidar

Zəga tay ɗəf adawka a van pay namta nan ɓa

¹ Səza daya net məyaŋgəlya. Gəlyanalva net kirtin Kore.

² Mənokum ɗiy pak məprəm wənəŋka; munokum naka dəlva, məpak sləmokum,

³ may kirin dit ɗiy gugriɗe, məsaryeɗ dit məzurayɗe sap pakə:

⁴ Maw wapel əpel na maɗɗula, kiyu tay əɗɗum aka zəga nawsəna.

⁵ In tat əpak sləmaw ammba wənməkkpaŋga; dawbay gəzləŋtəndəŋ naw na in əboton asənasəna.

⁶ Mə dəray nədawgeslne' aka pay nawray an məzuzelɗe akaraŋgək kiyu di?

⁷ Məppanən zit aka ərəh neti, gəm məgagdakanən zit sən kənaykənay na arya neti.

⁸ Ɗəf tay nawman ɗəf maɓɓan ɓa, tay nawzi arya sən Maŋgəlva kawbit kiyən ɓa.

⁹ Arya nawbit ki ɗəf tuwãhĩ, agrak ɓa hã faɗə.

¹⁰ Wasan madaran hã faɗ sa? Amtə na əmpa ɓa sa?

¹¹ Adan ɗəf tay ula məsmaɗɗulet əmtaŋ məstaka dit dirweŋge gəm məs taggbalemɗe adawzaŋ əppanən arya net sit ɗiy meɓɓeti.

¹² Azet na gəla net wasan hã faɗə, təki nassa net wasan dugurmuku, Apsitinik iya net sit dəlveŋge.

¹³ Ɗəf də gagdak nan na, alya ɓa: məstakayi də zəga mamayã məzəmta.

¹⁴ Aŋki an dədaɗɗa aket məzəsseleŋ aka kiziti; an dədawrih məzənnekeŋ də əpel na meti. Əziwe

¹⁵ Məndiktiŋ a təki net mimtit va gilewi; əmta yi məzuteɗti. Mazayən nan ɗiy en təstəs wandaptini. Gəlet wavvuyu, təki net mimtiti yi təki nassa neti.

¹⁶ Ya Maŋgəlva wabit zeŋgilew səma əmta, vi wagəmwa. Əziwe

¹⁷ Kədaɗɗa kotorok vi ɗəf agəɗək arya ɓa, an gagdak na gəla nan tay əddan abe ɓa.

¹⁸ Vi zəga tay adawka a van pay əmta nan ɓa, gagdak nan aprik na ammban ɓa.

¹⁹ Gala asan madarani, tay əfet aka zəni: «Tay əɗi ki zən na zəga tay əhhar ammbani!»

²⁰ Wambat əsap aza sayit efiŋgiɗni, məs awlanən na ɗah əkeɗeɗe ɓa.

²¹ Ɗəf də gagdak nan na, maɗɗulan tay ɓa: məstakayi də zəga mamayã məzəmta.