Gəlyaɗe 45 - Bible en Guidar

Əpel məmyã'ən nawɓel na məlyã

¹ Səza daya net məyaŋgəlya. Gəlya net kirtin Kore miyan də gəzləŋtəndəŋ. Əpel-məmyã'ən; gəlya naŋgla.

² Zu neki nawpel əpel neneke, waniyə gəlya nawɗi ki məlyã. Kəta hərzlumu dəsan zəga nawver na məskokono!

³ Kədayək kiyit ɗiy pak də lelewe, mok neki aza əpele. Vini Maŋgəlva azaɓok hã faɗə.

⁴ Aynan masalam nok agzeko, məs makrani, memetiŋ də gagdak noki yi.

⁵ Askə wəla də gagdak noko, apeŋ aka mota net pilseŋge agay ammba gegesiŋ gəm ulasahã gəm təstəsə. Gbogboŋ nok dərbet suk zəgeɗ nawgeslnegənən ɗəfa:

⁶ Herɗe nok mətekeɗ meti, watilikin mekret məzuzelɗe na məlyã, ɗiy waskotoŋ ammba təlko.

⁷ Maŋgəlva, mazaŋga na məlĩ nok faɗi, zleŋ na məlĩ nok zleŋ təstəsi yi, na sete yi.

⁸ Təstəs kəŋgələ, daraw kəzeli. Vini Maŋgəlva, Maŋgəlva nok, appay suk mẽl nannek daykiyit geleŋgiɗko.

⁹ Lukutɗe nok tahəŋ əffokoŋ nek va duvurzum, tigbire gəm va goɗoŋgoy. Səddəv gəla na məlĩ nok na slaybekne ɓaɓəlma gəzləŋtəndəŋ adawgilyen ənneken zuko.

¹⁰ Kirtit milyeŋge muguluŋgit tahəŋ aŋ dit miypa'aɗe noko, dəka vok dəzəŋ, ma'ayə̃k tat ziwwe də meleŋge na Ofir azata.

¹¹ Aprəma waŋ nawa, awla, apak sləmoko. Azgət kiyit ɗiy nok də gəla na afuko.

¹² Kəta lalaw nok dəda zə məlyã! Ndəni daya noko, appu' abani.

¹³ Waŋ na Tir, məsaryeɗ an day warakokun də əvəl neti.

¹⁴ Waŋ lalawək nawdah na məlĩ tat ətoŋ də lukut nat məbaysən gawla də meleŋge.

¹⁵ Də lukut iŋkilen temtemi, məkiyət aza məlyã. Mətoŋgiti gorɗeŋge ŋgbuɓɓo ŋgbuɓɓo, geleŋgiɗit dəzbatən azoko.

¹⁶ Mətoŋgiti də wənnek gəm əɗɗəla, tay etoŋgoŋ ana məlĩ da.

¹⁷ Kirtuk wagəmnən gəlet efiŋgiɗko! Wakəɗi ka milyeŋge aka dələv gboŋgu.

¹⁸ Wanəɗɗumon sləmok va sayit ɗiy agap pakə. Vaski yi'e ɗiy wagagdakokun hã sləɗ faɗə.