Gəlyaɗe 44 - Bible en Guidar

Daya vimi kəzgam di

¹ Səza daya net məyaŋgəlya; əpel-məmyã'ən net kirtin Kore.

² Maŋgəlva məprəmək də sləmamə, efiŋgiɗim apelsəmənək wəza metiŋ kəgəɗ aka pay neti, aka gala far lahəŋka.

³ Də vok kərɓehẽt ɗiy-ɗar kəzi ɗiy noko; kəsərək met ɗiy-ɗar kawzi ɗiy nok a gəleti.

⁴ Vi də masalam neti amõhnən dələv ka net ɓa; vet dəkõhgit ɓa. Gbogboŋgo, əɓap noko, gəm ulasahã nok dəɗɗa, vi kəŋgluke.

⁵ Istə Maŋgəlva, məlĩ nawa, is kədapsən əska wəla sən Yakob.

⁶ Də mbəlembəle nok mədawbey məzuzelɗe namə, də iya nok mədawndepet məzusilyoŋ akamə.

⁷ Vi aka bəle naw nəbay vaw ɓa, masalam naw avay na əska wəla ɓa.

⁸ Vi wakəkõhgəm səvet məzuseɓɗe namə, wakəgbo' wil aket məzuzeleməni.

⁹ Pay pak waməɗi ki Maŋgəlva, waməgagdakan iya nok hã faɗə. Əziwe

¹⁰ Ya mbara na kəzgaməka, kətoŋgəmək addəvit wili, kazbet məzəlpaŋ nam əmpa ɓa.

¹¹ Kədderemək dərɓe səbet məzuseɓɗe namə, məzuzelemən tahəŋ əppohetin zəgeɗ namə.

¹² Is tat əkkpaŋgam va gilew nampəra; kətəraygəmək aret ɗiy-ɗarə.

¹³ Istat əvəl ɗiy nok gbo'o ɗarə, tay kərah aka va kəlbih ɓa.

¹⁴ Kəkkpaŋgamək ka zəga na əra net meggeŋgiɗmə ka zəga nawmasa gəm ka nawzel net ɗiy en dəkaraŋ kiymə.

¹⁵ Kəkkpaŋgamək va zəga na mamba net ɗiy-ɗarə, ɗiy tahəŋ əɓlanən kiyit gala'gala' akamə.

¹⁶ Pay pak in tat kiyu rohrohu, wil araw pa'ə,

¹⁷ sən əpel nawzele gəm na ma totroŋ aba məzuzel məmpəlkiya.

¹⁸ As pak arəhməka, məzgət kiyuk ɓa, məwəwən aka wənmiyna nok ɓa.

¹⁹ Məmil dirɓe ɓa, məmzlah səka tive nok ɓa.

²⁰ Vi kəsərək mam aka dələv net wawayɗe kətoŋgəmək ara guzli titire.

²¹ Va məzgətək ki iya na Maŋgəlva namə, va mətələk vam aza maŋgəlva maɓɓani,

²² kəta Maŋgəlva dəkkesen wən nan ɓa sa? Vi nan asənək wən məɗama na makra ɗəfa.

²³ Aka wən noki yi adawbaymən pay pakə, məɗiyəm va ndergeyẽɗ a təki nawtaw wəleti.

²⁴ Asok ɗozloŋgo! Vimi kədawleŋ di Daya? Afɗahə, kəzgam wã' ɓa!

²⁵ Vimi kədawɗaman horok kəzgət ki əzəmsahã də tatwãh nam di?

²⁶ Vi ɓəlohɓəloh mənan aka burɗuku, gədəvəm slərat afuŋgu.

²⁷ Asil ade əbbah səmə, apələm vi moggon noko.