Gəlyaɗe 42 - Bible en Guidar

Gəlyeɗe en masuleti ( GLƊ 42—72 ) Va mune haɓakhaɓakə

¹ Səza daya net məyaŋgəlya. Əpel-məmyã'ən net kirtin Kore.

² Va mune adaɗɗa haɓakhaɓak ammbet iŋkile na lolohõ, vaski mayuk adawduwa Maŋgəlva nawa.

³ Meme na Maŋgəlva tay əduwəni, na Maŋgəlva madarani. Dewe nədawtoŋ karban zu aba Maŋgəlva di?

⁴ Kapay də dəfəɗ pak sin nawəŋgə way nawa, adan adawnahaŋ suwən pay pak na: «Ŋgay Maŋgəlva nok di?»

⁵ An in tat əɗɗumon an dətoŋgu, pay nədawtoŋ dit ɗiy addəv gəla na Maŋgəlva adazbawən rimiɗrimiɗ də ənnek metiŋgin gəm wəfet na wəzləra.

⁶ Vimi nəsaw kurumsu'o is ənɗəs di? Aka Maŋgəlva nəɗi əɗɗum nawa vi wanətibiren əmpa, ndəni məkõhguwa!

⁷ Maŋgəlva nawa, nəkurumsu'ko, vini nədaɗɗumok hã səka dələv na Yurden, səka Hermon gəm səka mossorgo metiŋ na Mise'ar.

⁸ Vovolumɗe tay iyanən ziti, is tat əppaɗgit akawa, atəpguwənək kpuŋgbumu.

⁹ Yawe dədarban moggon nan də kapay akawa, dəfəɗ na wanəyə sən gəlya, wanəkkaman Maŋgəlva nawa.

¹⁰ Maw aka ənah sən Maŋgəlva milɓe naw na: «Vimi kəzgət kiyu in əddaw sãhsãh məzuzelɗe naw əsərnən maw di?»

¹¹ Ma sleŋsleŋgu pak ɓalɓalə, məzuseɓɗe naw tahəŋ ərawəni ənahaŋ suwən pay pak na: «Ŋgay Maŋgəlva nok di?»

¹² Vimi nəsaw kurumsu'o in ənɗəs di? Aka Maŋgəlva nəɗi əɗɗum nawa vi wanətibiren əmpa, ndəni məkõhguwa gəm Maŋgəlva nawa!