Gəlyaɗe 40 - Bible en Guidar

Ɗiy pak dəsənən an kəgəɗ viwa

¹ Səza daya net məyaŋgəlya. Gəlyanalva na Davit.

² Əga naw aka Yawe nəɗiya, aɓe'ik kəlazawa, aprəmək əhəm nawa.

³ Akdəhwək sə vov daryaw, səra ndərɓa kpukpumo. Aziwguwək aka milɓe; asɓanək təlwa.

⁴ Aguluk gəlya meleketen a mawa, gəlya nawtibiren Maŋgəlva namə. Ɗiy diyɗa wawlanəni, wageslne'eŋgi, waɗiynən əɗɗum net aka Yawe.

⁵ Ənneki aza ɗəf məs dəppan əɗɗum nan aka Yawe, məza aket məsfərkeɗ ɓa, may awsler dit muwaŋ wən ɓa!

⁶ Sekeneɗ dit wəzeɗe kərəm naɗɗa viməŋ na, diyɗaŋgə Yawe Maŋgəlva nawa! Ɗəf tay nawslan də is ɓa. Wanətəl ma, wanəpel wən neti, vi diyɗaŋgə, adayaŋgək ki naŋɗa.

⁷ Də əzaɓ-Maŋgəlva may əvəl adannek ɓa, kəkol suwək sləmawa, kəssõh əvəl nawzla kurmbuɗuk may əzaɓ-Maŋgəlva navvuyon mambray ɓa.

⁸ Yaŋ nəmna: «Yaŋ na, nədek də ɗerewel məktəmən məverən aka wən nawa.»

⁹ Maŋgəlva nawa, wanəɗɗa an na mokroko, mahenziŋ nok a makrawi hədəkə.

¹⁰ Wanətəl ma aka təstəs nok addəv əkkal metiŋgini Yawe kəsənka maw arəm na akan ɓa.

¹¹ Nəɗaman təstəs nok a makraw ɓa, nəpelik aka gegesiŋ nok gəm əkõh kəvayə. Aba əkkal metiŋgini, nəɗaman moggon nok də gegesiŋ nok ɓa.

¹² Yawe, kəppan na ulasasãh nok viyu ɓa, moggon nok gəm gegesiŋ nok nawguwən pay pakə.

¹³ Vi dahãdahã pak əray agulwəka, hã aŋɗaŋ ɓa. Heslepeɗe naw adayaŋgək kiywa, nəɓap na kawlet ɓa. Adayaŋgək ki muhur kiywa, makraw akkpa'ka.

¹⁴ Yawe, kamə abitwa; Yawe agəm zuk ade əbbah suwa.

¹⁵ Kəta məzukayanən zeŋgilew nawzan pak wil dədenni, dəssoŋ zit so'orso'oru! Kəta məzənnekenin zit aka əray naw dəmndoŋ dirɓe, dərban wili!

¹⁶ Kəta məzumasaŋ akaw kuɗok! Kuɗok! Dəssoŋgən rohroh sit wili!

¹⁷ Məzukoyokun pak dənnekeŋ də is babyãk babyãkə, dəŋglunən əkõh nok dənahaŋ pay pak na: «Yawe metiŋgini yi!»

¹⁸ Naw məssahã nani, məzuraya, Daya aɗɗum akawa. Istə əbbah naw məkõhguwa. Maŋgəlva nawa, kəli ɓa.